Khua dêh čar ơi Lê Minh Hưng lăi pơtong tal rai čuă anai pơgôp ngă hơkrŭ pran đăo gơnang bruă kơđi čar, kơtưn tơlơi rô nao rai kơplah wah khua mua dua bơnah hăng pơtrut ngă hrŏm kơplah wah dua Ƀirô Khua pơ ala mơnuih ƀon sang dêh čar. Khua dêh čar pơsit tong Việt Nam lêng kơ đing nao hloh tơlơi rô nao rai hăng Lao; laih dong gum hrŏm kjăp phik hăng Kơnuk kơna laih dong hơdôm anom bruă bơdjơ̆ nao mơng dêh čar Lao pok pơhai tŭ tui hơdôm tơlơi pơkôl hơmâo bơtŭ ư hrŏm. Dua bơnah bơtŭ ư pơtrut kơtang amăng ngă hrŏm bơwih ƀong huă, sĭ mơdrô hăng tuh pơ alin; pơtrut tơkuh nao rai jơlan glông, apui lơtrik, pơplih mrô, pơđĭ kyar ngăn rơnoh hăng kơtưn pơbưp nao rai mơnuih ƀôn sang.

Dua bơnah ăt amra gum hrŏm pơphun klă hơdôm bruă mă amăng “Thun Gum pơgôp giang mah Việt Nam-Lao thun 2027”. Khua git gai pơ ala mơnuih ƀôn sang dêh čar Lao Sonexay Siphandone pơsit tong Ƀirô Khua pơ ala mơnuih ƀon sang dêh čar Lao amra tŏ tui gum hrŏm kjăp phik hăng Ƀirô Khua pơ ala mơnuih ƀon sang dêh čar Việt Nam, pơgôp pơtrut tơlơi rô nao rai giang mah hing ang, gum pơgôp yôm phăn, ngă hrŏm djop mơta hăng pơlir yôm phăn kơplah wah dua boh dêh čar kiăng jai hrơi pơđĭ kyar hơđong kjăp.