Mơ̆ng rơbêh kơ 70 tơlơi pơhing yom kơ tơhan djai pơsăn drơi amăng rơnuk blah wang, rơbêh kơ 2 blan rơgao, Grup tơhan hyu ĕp, kuai rŭ tơlang tơhan K75 tơring čar Lâm Đồng hơmâo ngă 32 tal krăo lăng, iâu pơthưr rơbêh kơ 800 wơ̆t čô mơnuih gum ngă bruă, hrŏm hăng rơdêh, măi mok klơi đĭ rơbêh 2.100 met khô̆i lŏn, boh pơtâo, hyu ĕp, rŭ đĭ 26 per tơlang tơhan ƀơi 9 boh să, phường amăng tơring čar. Trung tá Trần Xuân Hổ, Khua grup tơhan K75, Sang bruă khua tơhan tơring čar Lâm Đồng brơi thâo, lơ̆m mă bruă, grup hơmâo tơlơi djru ba klă biă mơ̆ng gong gai hăng mơnuih ƀon sang: “Hơdôm boh tơring, biă ñu lĕ Khul sem lăng hơdră djru mơnuih ƀon sang hơdôm boh să, phường ƀing gơmơi trun nao ngă bruă thâo djru biă, wơ̆t rơdêh, măi mok hăng gơnam tam či hyu ĕp. Mơnuih ƀon sang djru ba dong, gơmơi kuai rŭ pơsat tui anun ƀu kiăng duh ba hơget ôh”.

Hrŏm hăng bruă hyu ĕp, rŭ đĭ tơlang tơhan ƀơi hơdôm anih kiăng hyu ĕp, Rơwang tal sa mơ̆ng Bruă mă 500 hrơi mlăm, tơring čar Lâm Đồng ngă khut khăt bruă mă čơđeh tơlang, phun tơgơi ba pơčrang, kiăng thâo krăn ƀing tơhan djai ƀơi 11 ƀut pơsat tơhan amăng tơring čar. Thượng tá Trần Thanh Sơn, Kơ-iăng khua Ding jum kơđi čar Sang bruă khua tơhan tơring čar Lâm Đồng, brơi thâo, hơdôm ƀut pơsat tơhan hăng akŏ pơsat tơhan găn rơgao lu wơ̆t pơkra ming laih, anun bruă kuai rŭ tơlang tơhan hơmâo lu tơlơi tơnap. Rim čô khua, ling tơhan ngă bruă anai leng kơ gir găn pơ-iă rơgao hơjan, laih anun lăi mă pô khŏm gir ngă bruă djơ̆ hrơi pơkă, samơ̆ khŏm ngă amăng ƀrư̆, rim bruă ngă khŏm kơđiăng, tong ten: “Ayuh hyiăng rơngit adai amăng bơyan anai phara biă. Hơjan hlim na nao samơ̆ adơi ayong ăt gir ngă giong bruă mơn. Bruă mă čơđeh tơlang ngă djơ̆ hăng tơlơi pơčrâo mơ̆ng Ding jum ling tơhan, mơ̆ng bruă čih pioh, dưm pơmut boh thâo mrô, ĕp ƀuh tơlang truh kơ mă čơđeh tơlang, phun tơgơi, wơ̆t hăng ba glăi tơlang pơ pơsat, khut ƀu dưi ngă soh glăi, ngă pơtual ôh”.

Amăng 4.776 boh pơsat tơhan aka ƀu thâo anăn ƀơi 11 ƀut pơsat, ling tơhan ƀơi Lâm Đồng hơmâo mă tŭ 3.625 boh pơsat dưi ba pơčrang lăng, dưi ngă giong hlâo kơ hrơi pơkă 3 blan laih anun jao kơ Sang bruă pơčrang lăng drơi atâo gah Ling tơhan (Pháp y Quân đội), gah Ding jum ling tơhan či pơčrang ADN. Kông an tơring čar Lâm Đồng pơdong 16 anih čơkă mă tơlang tơleh ba pơčrang, hơmâo mă 1.371 drah kơtăk mơ̆ng kơnung djuai gah amĭ mơ̆ng tơhan djai pơsăn drơi aka ƀu thâo krăn pô, rơgao kơ 5 čô pơhmu hăng mrô kiăng ngă hnăng blung.

Tui hăng tơlơi pơtŏng sit mơ̆ng Khul tơhan kual 7, brơi ƀuh, amăng Rơwang tal 1 Bruă mă 500 hrơi mlăm, Lâm Đồng hơmâo ngă bruă djơ̆ lăp, mơ̆ng akŏ truh pơ tlôn, tŭ yua, pơhlôm 6 rơđah; tơlơi pơhing, pôr pơthâo dưm kơnar, djŏp anih; hyu ĕp, rŭ đĭ hăng pran jua gir run, glăm bruă hăng hơdor tơngia dlăm biă mă; bruă mă čơđeh tơlang ƀơi hơdôm ƀut pơsat dor tơhan hơmâo ngă ha amăng plĕ, khut khăt, tŭ yua. Ơi Đinh Văn Tuấn, Kơ-iăng khua jơnum min mơnuih ƀon sang tơring čar, Khua khul git gai hyu ĕp, kuai rŭ tơlang tơhan hăng pơsit anăn krăn pô tơhan djai pơsăn drơi kơ lŏn ia tơring čar Lâm Đồng, brơi thâo, bruă blung a rơwang tal 1 Bruă mă 500 hrơi mlăm jing tơlơi pơtrut pran jua, kiăng tơring čar tŏ tui bruă hyu ĕp, ba glăi adơi ayong anong wa djai pơsăn drơi kơ lŏn ia, glăi pơ plơi pla, sang anŏ hăng ƀing gŏp ñu: “Lâm Đồng dưi ngă giong bruă hlâo kơ hrơi pơkă 3 blan. Anom bruă dưi ngă giong tañ hloh amăng 4 boh tơring mơ̆ng Khul tơhan. Anai jing tơlơi mơak biă amăng Khul git gai hăng ling tơhan gum ngă bruă anai”.

Đại tá Nguyễn Thanh Quảng, Kơ-iăng khua kơđi čar Sang bruă khua tơhan tơring čar, Kơ-iăng khua git gai hyu ĕp, kuai rŭ hăng pơsit anăn krăn pô tơhan pơsăn drơi kơ lŏn ia tơring čar Lâm Đồng, lăi tơpă: “Amăng hrơi blan anai, hơmâo mơn bruă ƀing ta aka ƀu ngă giong anun lĕ bruă hyu ĕp, kuai rŭ đĭ tơlang tơhan pơsăn drơi kơ lŏn ia. Bruă kiăng ngă mơ̆ng Khul git gai tơring čar jao kơ ling tơhan hyu ĕp, laih anun ƀing ta kiăng ngă lĕ hơmâo rŭ đĭ 50 per tơlang, jing ră anai glăk hơmâo 26 per tơlang đôč. Rơwang tal 1 aka ƀu giong ôh tui anŏ kiăng ôh”.

Mut amăng Rơwang tal 2 Bruă mă 500 hrơi mlăm, mơ̆ng anai truh kơnôl 27/7/2027, tơring čar Lâm Đồng kiăng hyu ĕp, rŭ đĭ 124 per tơlang tơhan. Hăng mơnuih nao tơl anih ngă bruă, bruă hyu ĕp ƀu kơnong kiăng kiăo hmao hrơi blan đôč ôh mơ̆ ăt jing thun blan pơpŭ kơ mơnuih djai yua kơ Lŏn ia. Hăng tơlơi gơgrong bruă, abih pran jua hăng khut khăt mơtăm, tơring čar Lâm Đồng glăk gir ba glăi lu adơi ayong tơhan djai pơsăn drơi glăi pơ lŏn amĭ ƀă yă pơjing, pơđŭ glăi tơlơi čang rơmang mơ̆ng pô sang hăng ƀing gŏp./.