Ƀơi sang hră mrô 3, sang hră pơdong phara mrô 1, sang hră gưl I Tây Nha Trang, tơring čar Khánh Hòa, ƀing čơđai hrăm dŏ đăm glăi yang hrơi dong ăt glăi pơ sang yang hrơi dong hrơi pă rĭm wŏt hrơi tơjuh, tơdơi anun ƀing amĭ ama amra ba čơđai nao pơ sang hră phun kiăng hrăm tơlơi hrăm Tin Học. Ƀơi anih sang pơdong phara mrô 1 aka ƀu hơmâo anih hrăm măi komputơr, ngă kơ bruă pơphun pơtô hrăm kơplah wah hơdôm anih pơtô aka ƀu pơhlôm mut hrŏm. Čơđai sang hră ƀơi anai ăt ƀiă đôč tơlơi gal mut hrŏm hơdôm bruă kar hăng ƀing čơđai ƀơi sang hră pơdong phara ƀudah sang hră phun. Yă Nguyễn Thị Dung, amĭ čơđai sang hră hrăm anih 4, sang hră pơdong phara mrô 1, sang hră gưl I Tây Nha Trang lăi nao tơlơi tơnap tap: “Kiăng nao mơng sang hră pơdong phara anai nao pơ sang hră phun kah mơng hơmâo măi komputơr či hrăm. Hiưm ƀing amĭ ama anăm, lơm yang hrơi dong nao pơgiăng glăi, truh 1 mông ha mơkrah pơgiăng nao hrăm pơ anun. Lơm anun ƀing čơđai hrăm dŏ glăi yang hrơi dong, samơ̆ truh hrơi pă rĭm wŏt hrơi tơjuh ăt khŏm nao pơgiăng glăi tui anun. Lăi biă ñu bruă pơtô hrăm ăt ƀu gêh gal pơhmu hăng ƀing čơđai pơ sang hră phun, gơnam yua amăng hrăm hră ăt tui anun mơn.”

Bruă pơmut hrŏm amra hrŏ ƀiă anih wai lăng samơ̆ bruă pơtô hrăm ăt ƀu găl djop kơplah wah hơdôm hơdôm boh sang hră. Lơm gơnam mă yua aka ƀu lăp djơ̆ tơlơi rơkâo, ƀing čơđai ăt kơƀah gơnam yua, bơ ƀing amĭ ama ăt glêh glar lơm nao pơgiăng ană bă nao hrăm hră. Sang hră gưl I Tây Nha Trang hơmâo akŏ pơjing hluai tui bruă pơmut hrŏm 7 boh sang hră, hơmâo 1 boh sang hră phun hăng 6 boh sang hră pơdong phara, hăng 198 anih hrăm, giăm 7.400 čô čơđai. Sang hră gưl II Tây Nha Trang hơmâo akŏ pơjing mơng 6 boh sang hră, hăng giăm 5.400 čô čơđai.

Bruă pơmut hrŏm blung a djru ngă pơmut hrŏm akŏ bruă dưm dăp, tơlơi pơkă hăng kah pơpha bruă jao. Samơ̆, pok prong jing hơdôm rơtuh anih hrăm, lu sang hră pơdong ataih hrŏm hăng anŏ phara kơ gơnam mă yua, kual dŏ hơdip phara kơ ƀing čơđai ngă kơ bruă wai lăng bưp lu tơnap tap. Khua sang hră kiăng pioh hrơi mông git gai bruă mă kơplah wah hơdôm anih hră, lơm anun bruă pel ĕp bruă ngă, nao ĕp lăng mông pơtô hrăm hăng kiăng thâo bruă mă kơ ƀing nai, ƀing čơđai ăt tơnap tap mơn. Wai lăng tui hră pơ-ar, hră lăi pơthâo mơng ataih ƀu dưi plih hĭ abih bang bruă kiăo tui lăng bruă mă tơl rĭm boh sang hră, sit biă ñu bruă tañ ĕp ƀuh hăng djru brơi hmao tlôn ƀing čơđai kăng djru ba. Mơng tơlơi sit nik anun, Jơnum min mơnuih ƀon sang phương Tây Nha Trang rơkâo kiăng pơčlah sang hră gưl I hăng gưl II Tây Nha Trang, rĭm gưl hrăm pơčlah jing 2 boh sang hră phara. Ơi Nguyễn Công Danh, kơ-iăng Khua Jơnum min mơnuih ƀon sang phương Tây Nha Trang brơi thâo: “Ƀing čơđai sang hră gưl II glăk thun prô̆ tơdăm prăm dra, ƀing nai kiăng kiăo tui lăng čơđai ƀơi sang hră. Mơng 70-80 anih hrăm, kah pơpha tui anun kah amuñ wai lăng. Hăng ƀing čơđai sang hră gưl I, sa čô kơ-iăng khua glăk wai lăng 1 boh sang hră pơdong phara, kiăng wai lăng 4 boh sang hră pơkŏn dong. 4 Boh sang hră anai ăt ƀu giăm ôh. Kar hăng ƀơi anai, gah Hòn Nghê khŏm găn nao sa ară ia krông. Yua anun ƀu dưi wai lăng klă, sui pơ anăp dong ăt glêh mơn.”

Blan 8/2026, tơring čar Khánh Hòa akŏ pơjing hơdră dưm dăp glăi sang hră, lăi pơthâo hăng hơmâo tơlơi pơgôp hiăp hăng Khul apăn bruă Ping gah tơring čar. Tơdơi kơ dưm dăp, mrô sang hră hrŏ trun trun 66%. Samơ̆, đơ đam tơring čar ăt hơmâo 18 boh sang hră prong rơbêh 100 anih hrăm, lu hloh ƀơi hơdôm plơi prong hơmâo lu mơnuih dŏ hơdip. Tơdơi kơ dua blan pok pơhai, sa, dua boh ƀon lan hơmâo rơkâo pơčlah sang hră pơprong jing lu anih pơtô hrăm ƀudah akŏ pơjing dong sang hră phara. Ră anai gơnong bruă pơtô pơjuăt tơring čar Khánh Hòa glăk pơƀut glăi tơlơi pơgôp hiăp, rơkâo hơdôm boh tơring pel ĕp glăi hơdôm boh sang hră pơprong, hơmâo lu anih pơdong phrâo hăng kual wai lăng pơprong, mơng anun rơkâo đĭ kiăng hơmâo hơdră lăp djơ̆./.