VOV4.Jarai-Ngă tui Hră pơtrun mrô 11/NQ-CP mơ̆ng kơnuk kơna kơ hơdră rŭ glăi tơlơi bơwih ƀong huă mơnuih mơnam, sang bruă prăk djru mơnuih mơnam tơring čar Dak Lak hlăk pơtum, pơtrut brơi čan prăk, ba rơnoh prăk djru dưi trưh pơ mơnuih ƀun rin čan laih anun ƀing hơmâo anăn kơnuk kơna djru. Mơ̆ng anun, kiăng gum ba mơnuih ƀôn sang găn rơgao hĭ tơlơi tơnap tap, tañ hơđong tơlơi hơdip mơda, pơhlôm klă tơlơi hơdip mơda mơnuih mơnam, pơtrut hăng pơđĭ kyar bơwih ƀong huă mơnuih mơnam tơdơi kơ thun blan bơbeč yua mơ̆ng klin Covid 19 ngă.

Blan 3 thun 2022, dưi čan 10 klăk prăk mơ̆ng hơdră djru čơđai sang hră anih prong čan blơi măi komputer, tui hluai mơ̆ng rĭm sang anŏ, ayong Nguyễn Thuấn dŏ pơ grup plơi mrô 2, tơring kual Ƀuôn Trấp, tơring glông Krông Ana hơmâ blơi mơtam măi laptop kơ ană đah rơkơi ñu hrăm anih 7. Ayong Thuấn hok mơak yua tơlơi anun, dưi pơđut yơh bruă ngă rơkâo yua hrom na nao măi telephôn rơgơi mơ̆ng ñu brơi kơ ană hrăm online.

Sang bruă prăk djru mơnuih mơnam tơring čar Dak Lak kĭ hră gơgrong brơi čan tui Hră pơtrun 11

Ră anai, klin abih laih, samơ̆ măi laptop ñu blơi dŏ tŭ yua đôč yua kơ ană ñu thâo mă yua lu hơdră tơlơi kơhnâo ia rơgơi pioh hrăm online pơkŏn. Ñu lăi, hơdră djru kơ čơđai sang hră anih prong, gưl prong blơi măi komputer, djơ̆ lăp biă mă hăng sang anŏ ñu, yua sang anŏ kơƀah prăk kăk:

"Ră anai, gơmơi čan 10 klăk prăk sa blan nao tla prăk kơmlai 10 rơbâo prăk đôč, laih dơ̆ng hrơi blan tla lĕ kơnuk kơna pơkă amăng 3 thun, amăng anun 6 blan tla ha wơ̆t amăng ƀiă. Kâo dŏ pơmin sang anŏ gơmơi tơnap tap đơi kiăng biă mă hơmâo prăk djru djơh hăng anai, ba glăi boh tŭ yua kơ sang anŏ”.

Ăt amăng hơdră čan prăk tui Hră pơtrun mrô 11, ayong Nguyễn Nam Giang dŏ pơ tơring glông Krông Ana brơi thâo: Hăng hnong pơhrui glăi mơ̆ng rơkơi bơnai ñu ră anai, pioh pơkom prăk kăk, dưi djop man pơdong sang hă sui thun biă mă. Yua kơ anun yơh, lơ̆m thâo tơlơi pơhing čan prăk djru kơmlai tui Hră pơtrun mrô 11 mơ̆ng kơnuk kơna ñu hlong ngă hră čan mơtam 450 klăk, dưm dưm hăng 50% rơnoh prăk man pơdong sang, kơmlai 4,8% sa thun. Yua čan prăk djru kơmlai tui anun yơh, sang anŏ ñu dưi man pơdong sang phrâo, tơlơi hơdip mơda hơđong ƀiă.

“Yua hơmâo rơnoh prăk djru anai hơmâo prăk čan pơdong sang, hăng rơnoh prăk kơmlai tui anun ăt ƀiă mơ̆n kiăng hơmâo prăk djop pơdong sang”.

Măi komputer dưi čan tui rơnoh prăk djru brơi kơmlai čan Hră pơtrun 11 hơmâo gum ba lu čơđai sang hră găn rơgao tơlơi tơnap tap hrơi blan hrăm online  brơi dŏ pơčlah pơ sang anŏ yua klin Covid 19

Amăng tal anai, anom bruă ngă hră pơar čan prăk sang bruă prăk djru mơnuih mơnam tơnap tap tơring glông Krông Ana, kơnuk kơna pơpha nao 7 klai prăk pioh brơi čan tui Hră pơtrun mrô 11 mơ̆ng kơnuk kơna. Yap truh ră âni anom bruă brơi čan pơsir bruă mă hăng pok prong hơdră djru kơ čơđai sang hră čan hơmâo 53 čô tuai čan rơnoh prăk 2 klai 400 klăk prăk; brơi čan djru čơđai sang hră blơi măi komputer hơmâo 2 čô rơnoh prăk20 klăk; brơi čan djru mơnuih mơnam tơnap tap man pơdong sang kơ 2 čô čan rơnoh prăk 770 klăk prăk. Ơi Bùi Quang Tuyên, Khua anom brơičan prăk sang bruă prăk djru mơnuih mơnam tơring glông Krông Ana, tơring čar Dak Lak lăi:

“Anom bruă brơi čan mơ̆ng Sang bruă prăk djru mơnuih mơnam tơnap tap jao brơi giăm 7 klai, amăng blan 5 hơmâo brơi čan abih mơtam. Rơnoh prăk tui Hră pơtrun mrô 11 anai hơmâo djru hmao kru yua djru mơnuih ƀôn sang tơnap tap amăng mông klin kheng ngă, kiăng hơmâo prăk čan tuh pơ alin bơwih ƀong huă rŭ glăi bruă mă hơdip mơda kơ sang anŏ”.

Tui hăng mrô rơnoh jŭ yap mơ̆ng Sang bruă prăk djru mơnuih mơnam tơnap tap tơring čar Dak Lak, tơring čar hơmâo Gơnong dlông djru 71 klai prăk pioh pok pơhai hơdră brơi čan prăk djru kơmlai tui Hră pơtrun mrô 11 kah hăng: brơi čan djru pơsir bruă mă, djă bong hăng pok prong bruă mă phrâo; brơi čan prăk pơdong sang kơ mơnuih tơnap tap čan laih anun brơi čơđai sang hră anih prong, djop gưl čan, jing ƀing tơnap tap mơ̆n pioh blơi măi komputer hrăm hră, bơwih brơi hrăm hră pơar. Truh ră anai, đơ đam tơring čar hơmâo brơi 52 klai prăk čan tui hơdră djru anai. Phrâo anai hloh, Dak Lak ăt dưi hơmâo Gơnong dlông 260 klai prăk tui Hră pơtrun anai pioh brơi čăn ngă tui Hră dêh čar pơtrut bơwih ƀong huă mơnuih mơnam kual mơnuih djuai ƀiă hăng kual čư̆ siăng čan mơ̆ng thun 2021-2030 laih anun brơi čan kơ djop pok sang hră pơtô hrăm čem rông čơđai muai anet, sang hră gưl sa gah rơngiao kơnuk kơna yua bơbeč djơ̆ klin Covid 19 ngă.

Sang phrâo pơdong ƀiă giong laih mơ̆ng sang anŏ ayong Giang

Ơi Nguyễn Minh Hướng, Kơ-iăng Khua sang bruă prăk djru mơnuih mơnam tơnap tap tơring čar Dak Lak brơi thâo, kiăng hơmâo rơnoh prăk čan ba nao hmao kru kơ mơnuih tơnap tap čan, tơdơi kơ Khua dêh čar kĭ hră pơtrun mrô 11 kơ hơdră rŭ glăi pơtrut pơđĭ kyar bơwih ƀong huă tơdơi kơ klin kheng Covid, sang bruă prăk djru mơnuih tơnap tap hơmâo lăi pơthâo hăng Jơnum min mơnuih ƀôn sang tơring čar, ngă hră pơthâo pioh pok pơhai ngă tui hră pơtrun anai.

Sang bruă prăk djru mơnuih mơnam tơnap tap ăt ngă hrom djop sang bruă, khul grup amăng tơring čar pioh jŭ yap glăi, pơtum brơi pơsir mơtam tơlơi dŏ gun, tañ brơi čan prăk tơpă, pơhaih rơđah rơđong. Hrom hăng anun, sem glăi, krăo lăng laih anun lăi pơthâo brơi kơ mơnuih ƀôn sang čan mă yua prăk djơ̆ hơdră tơlơi kiăng, đah mơ̆ng hơmâo boh tŭ yua:

“Tơdơi kơ lăi pơthâo kơ rơnoh prăk brơi čan sang bruă prăk lăi pơthâo hăng Jơnum min mơnuih ƀôn sang tơring čar kiăng ngă hră git gai djop sang bruă, khul grup ngă hrom Sang bruă prăk ĕp glăi hlơi hơmâo anăn kiăng čan. Tơdơi kơ hơmâo laih anăn rơđah rơđah Sang bruă prăk djru mơnuih mơnam git gai anom brơi čan ƀơi tơring glông ngă hrom lu khul grup sang bruă pok pơhai brơi čan tañ hmar hloh, djơ̆ pô, djơ̆ anăn hăng mă yua djơ̆ hơdră”.

Amăng thun blan tơnap tap yua Covid 19 ngă, rơnoh prăk kơnuk kơna djru tui Hră pơtrun mrô 11 lĕ kah hăng gai kăl pok brơi ngă anŏ pơtrut tui pơđĭ kyar, bơwih ƀong huă, pơsir bruă mă hăng hơdôm tơlơi hơmâo pơkŏn amăng mơnuih mơnam, djru hrom pơtrut bơwih ƀong huă mơnuih mơnam ƀơi Dak Lak rŭ glăi, pơđĭ kyar.

Nay Jek: Pơblang