VOV4.Jarai - Thun 2022, Anom bruă apui lơtrik Dak Lak hơmâo jao rơbêh 59 klai prăk kiăng kơ pơkra ming hĭ abih 48 dơnao ia apui lơtrik. Truh abih blan 6, hơdôm anom bruă hơmâo pơgiong hăng mă yua  prăk kak man pơkra ming 8 dơnao ia apui lơtrik pơprong hăng rơnoh prăk mă yua giăm 10 klai 300 klăk prăk. Ră anai kông ti glăk pơtrut tañ bruă man pơkra ming hơdôm ring bruă dŏ glăi, gir run pơgiong amăng rơwang tal II anai.

Pơkra ming apui lơtrik ƀơi tơring glông Čư̆ Mgar

Amăng hrơi mông man pơkra, ngă tui hơdră pơhlôm hơđong apui lơtrik yua, anom bruă apui lơtrik Dak Lak hơmâo pel ĕp tong ten, ba tơbiă hơdră man pơkra klă hloh tui jơlan hotline ƀudah pơlir hăng hrơi mông kup jang jai kiăng pơhlôm brơi bruă pơkra ming tui tơđar ƀơi hơdôm anih pơđuăi apui lơtrik TBA 110kV amăng kual. Hrŏm hăng anun hơdôm ring bruă yua gơnong bruă apui lơtrik pơphun ngă mă pô, kông ti ăt ngă tui hơdră hơduah ĕp anom bruă pơkra ming mơng pơkŏn kiăng kơ klă hloh amăng bruă pơkra ming djơ̆ hăng hơnong pơkă pơtrut djơ̆ hrơi mông, pơhlôm pran đăo gơnang amăng bruă yua apui lơtrik.

Siu Đoan: Pơblang