Ƀu truh ha wơ̆t hrơi tơjuh dong tah truh laih hrơi pơplông abih anih 12 thun 2023. Hơdôm boh sang hră gưl 3 ƀơi tơring čar Dak Lăk hơmâo ngă giong laih bruă prăp rơmet pơhlôm kiăng hrơi pơplông rơnuk rơnua. Tal pơplông abih anih 12 thun anai, tơring čar Dak Lăk hơmâo 33 anih pơplông sit nik hăng rơbêh 21.100 čô čơđai pơplông, hơmâo giăm 3.000 čô nai, mơnuih wai lăng hăng bơwih brơi ƀơi anih pơplông. Ơi Phạm Đăng Khoa, Khua gơnong bruă pơtô hăng pơjuăt tơring čar Dak Lăk brơi thâo: Gơnong bruă hơmâo akŏ pơdong grup hlăk ai, pel ĕp hlâo kơ hrơi pơplông kiăng pơhlôm kơ hrơi pơplông klă; pơtŏp brơi kơ ƀing nai wai lăng hrơi pơplông; pơtô pơblang, pôr pơthâo kiăng tañ hmư̆ djŏp tơlơi pơplih phrâo amăng tal pơplông thun anai. Ngă hrŏm hăng abih bang anom bruă prăp lui hơdră pơhlôm rơnuk rơnua hơđong kơjăp kơ ƀing čơdai tơdơi kơ hơmâo tơlơi rung răng ƀơi tơring glông Čư̆ Kuin phrâo rơgao.