VOV4.Jarai - Bơdjơ̆ nao bruă sa, dua boh ƀon lan pơčlah ƀing mơnuih glăi pơ plơi pla ƀong tết Nhâm Dần 2022, Jơnum min mơnuih ƀon sang tơring čar Dak Lak hơmâo hră pơ-ar git gai djop ƀon lan anăm pơčlah mơnuih glăi pơ plơi pla ƀong tết mơ̆ pok pơhai hơdôm hơdră hơmâo Ding jum ia jrao črâo ba amăng pơgang klin Covid-19. Tơdơi kơ Sang ia jrao să Ea Blang, plơi prong Buôn Hồ, Dak Lak rơkâo sa, dua čô mơnuih glăi pơ tơring čar Dak Lak ƀong tết khŏm pơčlah mă pơ sang 7 hrơi mah hơmâo tlâ̆o 3 ară vaccine laih, lơ 26/1, Jơnum min mơnuih ƀon sang tơring čar Dak Lak hơmâo hră pơ-ar rơkâo khul git gai hăng Anom bruă git gai pơgang klin Covid-19 ƀơi hơdôm tơring glông, plơi prong ječ ameč pel ĕp, git gai djop anih anom, ƀon lan ƀu dưi ngă tui tơlơi pơkă phara ƀơi ƀon lan amăng pơgang klin Covid-19 mơ̆ khŏm ngă tui tơlơi pơkă mơng Kơnuk kơna, Ding jum ia jrao , anăm ngă tơnap brơi mơnuih ƀon sang glăi pơ plơi pla ƀong tết. Truh mơguah lơ 27/1, tơring čar Dak Lak hơmâo 15.714 čô mơnuih ƀă klin Covid-19, amăng anun dŏ 2.456 čô mơnuih glăk pơjrao hăng 85 čô mơnuih djai.

Siu Đoan: Pơblang