VOV4.Jarai-Pơdjơ̆ nao bruă ngă čuk pơkra jơlan djơ̆ hĭ glai klô along dêh čar ta wai lăng, pioh ngă jơlan Trường Sơn Đông, Jơnum min mơnuih ƀôn sang tơring čar Dak Lak ngă hră pơtrun, rơkâo Khua git gai tơhan phun pơkra jơlan gah Ding jum ling tơhan brơi pơdơi yơh čuk pơkra jơlan anun jăng jai. Tơring čar Dak Lak ăt rơkâo Khua git gai phun pơkra jơlan gah Ding jum ling tơhan ngă hrom tong ten hăng lu anom bruă kơnuk kơna tơring čar Dak Lak ĕp lăng, pơtong glăi, pơsir hơdôm tơlơi soh glăi lơ̆m čuk pơkra jơlan Trường Sơn Đông amăng kual lŏn glai aka pơblih brơi mă yua hơdră pơkŏn.

Laih dơ̆ng, Khua git gai phun pơkra jơlan gah Ding jum ling tơhan, lăi pơthâo ngă tui, lăi pơthâo boh yôm phun mơ̆ng Jơnum min mơnuih ƀôn sang tơring čar Dak Lak laih anun Ding jum Bruă hmua hăng pơđĭ kyar plơi pla kơ bruă ĕp glăi, sem lăng abih bang đơ đam lŏn glai, djuai kyâo pơtâo glai klô kiăng pơblih hơdră mă yua, anăp nao bruă čuk jơlan Trường Sơn Đông. Mơ̆ng anun, lăi pơthâo hăng Ding jum bruă hmua hăng Pơđĭ kyar plơi pla ngă tui hơdră pơblih mă yua glai along kơ bruă pơkŏn.

Nay Jek: Pơblang