Tơdơi kơ pơmut glăi tơring čar, ƀơi djop arăt jơlan nao rai mơ̆ng kual gah Ngŏ hăng kual gah Yŭ tơring čar Dak Lak, glông gơnam tam sĭ mơdrô cơdơ̆ng bơtơpư̆ đhơ đhit ƀuh rơđah. Kiăng lăi, gơnam boh troh đang hmua mơ̆ng kual gah yŭ tui amăng rơdêh trun nao pơ ia rơsĭ arăng blơi yua, akan hơdang ia rơsĭ mơ̆ng kual gah Ngŏ ăt điw nao pơ čư̆ siăng  ba brơi kơ mơnuih ƀôn sang kual yŭ blơi yua; hrŏm sa mông anun, tuai rơnguai hyu gnui mơ̆ng kual yŭ trun nao pơ lŏn dăo ter hang ia rơsĭ lu tui, pơjing jơlan nao pơwơ̆t glăi đĭ trun “Nao pơ ia rơsĭ, đĭ glăi pơ čư̆ siăng” na nao mơtam yơh.

Hrŏm hăng hơdôm rơdêh pơgiăng gơnam anun, jing tơlơi bưp nao rai, pơčrong sai, kĭ pơkôl ngă hrŏm sĭ mơdrô plah wah hơdôm anom bruă mơdrô dua bơnah. Yă Nguyễn Thị Nga, Khua khul đah kơmơi ƀing sngă bruă mơdrô Phú Yên brơi thâo, tơdơi kơ pơmut glăi, tơlơi rô nao rai sĭ mơdrô mơ̆ng kual Ngŏ-Yŭ hơmâo đĭ tui rơbêh ha mơkrah pơkă hăng adih, sa boh mrô brơi ƀuh “Ia rơsĭ” hăng “Glai klô” hlăk djă tơngan hrŏm sit nik, kiăng hrŏm hơbit pơjing sa anih anom ngă bruă bơwih ƀong huă hrŏm sa bit tŭ ư hrŏm sa hnơ̆ng.

“Ƀing gơmơi hrŏm hơbit khom sem lăng kiăng thâo hluh tơdruă, hơduah ĕp anih anom sĭ mơdrô, kual gah Ngŏ lĕ hơduah ĕp bruă ngă hmua hiư̆m pă, kual gah yŭ hơduah ĕp bruă mă akan hơdang hiư̆m pă. Ră anai kâo ƀuh lu gơyut mơ̆ng kual gah yŭ Dak Lak nao ĕp pơ kual gah Ngŏ jai hrơi lu kiăng blơi akan hơdang hăng tuai čuă ngui lu biă mă”.

Hrŏm hăng bruă kơtưn pơblih nao rai kual gah ngŏ hăng gah yŭ, tuai čuă ngui hơmâo anŏ pơblih klă tui mơ̆n ba yua anŏ gêh găl kơ “Sa boh tơring čar-hơmâo dua anŏ gêh găl lŏn adai brơi”. Thun 2026, Dak Lak pơtong rơđah ană hmư̆ hing “Hơduah ĕp kông ngăn lŏn glai”, ba yua rơnoh yom gơnam tam hơmâo sit nik, gơnam tam  mơak pran jua, anăp nao tơhnal pơkă čơkă 8 klăk wơ̆t tuai hyu ngui, kiăng hơmâo prăk pơhrui glăi truh 16 rơbâo klai. Pran kơtang mơ̆ng Dak Lak lĕ amra ngă bang bơngač kơtang găn rơgao 41 črăn phim anăn “Dak Lak nao lĕ hor mơtam yơh” hơmâo pơdah amăng plang tơlơi pơhing tivi, lăi pơtong hơmâo pơtum lu gru grua hiam, mơnong ƀong huă, ană mơnuih hăng lŏn mơnai glai klô hing ang.

Ơi Trần Hồng Tiến, Khua Gơnong bruă Gru grua Pơrơguăt drơi jăn hăng tuai čuă ngui tơring čar Dak Lak brơi thâo, tơring čar amra pơphun lu bruă ngă čơkă tuai hyu ngui amăng pă bơyan sa thun, lir hơbit hăng bruă ngui ngor ngă yang tui gru grua pơdah brơi tuai găn rơgao ĕp lăng, hneč mă hrơi pơdơi akŏ thun phrâo laih anun hrơi pơdơi jơnum prong mơ̆ng dêh čar amăng thun, mông anun kiăng pơhưč tuai, mơnuih ƀôn sang ƀing ngă bruă pơdơi pơdă, hyu ngui ĕp lăng gru grua. Hrŏm hăng anun, pơtrut pôr pơthâo rup rap, tơlơi pơhing, lăi nao kơ lu mơta kông ngăn, anŏ gêh găl ƀơi anih či nao ngui, ĕp lăng, pơhưč khul tuai hor nao ngui hăng dŏ glăi, hyu mơ̆ng kual čư̆ siăng trun pơ kual ia rơsĭ.

“Tơ tă anai Dak Lak ăt hơmâo kĭ pơkôl hăng lu tơring čar kah hăng Khánh Hòa, Lâm Đồng, Gia Lai, Hà Nội, ƀôn prong Hồ Chí Minh, Đà Nẵng. Hăng Khánh Hòa lĕ ƀing gơmơi pơtum kiăng pơhưč tuai jar kmar mơ̆ng Khánh Hòa đĭ nao ngui pơ Dak Lak, tơdơi kơ jơlan rơdêh đuăi hmar čuk pơkra ngă giong, gơmơi amra pôr pơthâo rup rap mơ̆ng Dak Lak pioh ngă hiư̆m pă gơnam čơkă tuai hyu ngui pơhưč tuai jar kmar sit nao pơ Khánh Hòa glăi pơ Dak Lak”.

Kiăng djop bruă mă bơwih ƀong huă mơ̆ng Dak Lak phrâo pơtrut tui anŏ gêh găl, jơlan glông nao rai mơ̆ng tơring čar hơmâo yak rơbat nao yom biă mă. Jơlan rơdêh đuăi hmar Khánh Hòa-Ƀuôn Ma Thuôt hơmâo pơhluh rơdêh dưi nao rai, jơlan 14 gah ngŏ Ƀuôn Ma Thuôt ăt hluh laih, jơlan rơdêh đuăi hmar Quy Nhơn-Chí Thạnh ăt giăm ngă yang brơi rô nao rai sit nik.

Tui hăng ơi Trần Đình Long, khua hơđăp Jơnum min Tơlơi phiăn mơ̆ng Sang bruă khua pơ ala mơnuih ƀôn sang dêh čar, lơ̆m anih anom pơđĭ kyar dưi pok pơhư prong hăng jơlan nao rai dưi pơhluh abih djop kual ngă giong, bruă nao rai pơdŭ pơgiăng, ba hyu gơnam sĭ mơdrô laih anun mơnuih mă bruă djop sit mơ̆n pơđĭ kyar bơwih ƀong huă sĭ mơdrô-bơwih bơwăng amra gêh găl hloh, biă mă ñu amăng kual hlâo adih aka ƀu pơđĭ kyar.

“Plah wah Tuy Hòa hăng Ƀuôn Ma Thuôt hơmâo anih tong krah črăn dŏ kaih ră anai lĕ pơđĭ kyar mơ̆, jing anih anun anŏ gêh găl prong biă mă. Ră anai sa boh tơring čar laih sit mơ̆n ƀu djơ̆ lăi kual ataih dơ̆ng tah. Sit hơmâo jơlan glông nao rai hluh gah, bruă rô nao rai, pơpha khul mơnuih mă bruă, pơđĭ kyar sĭ mơdrô-bơwih bơwang amra pok brơi jơlan prong hloh-bruă sĭ mơdrô gêh găl prong mơ̆n. Anai yơh anŏ gêh găl prong, pran kơtang ƀing ta pơphun ba yua”.

Yak nao amăng guang bruă thun 2025-2030, Dak Lak pơtong rơđah bruă phun čuk pơkra jơlan glông, pơblih bruă ngă hră pơar hăng jak iâu tuh pơ alin amuñ hăng gêh găl hloh. Khua Jơnum min mơnuih ƀôn sang tơring čar Dak Lak, ơi Tạ Anh Tuấn brơi thâo, hăng boh yom phun pơtruh nao rai anih ngă bruă mơ̆ng lŏn glai čư̆ siăng trun pơ kual ia rơsĭ, tơring čar amra akŏ pơjing ruăi rơnoh pơhrui glăi mơ̆ng bruă čơkă tuai hyu ngui, ĕp lăng đang hmua, kyâo glai laih anun anih akan hơdang gêh găl prong biă mă:

“Pơtruh nao rai kual Dap Kơdư hăng kual Ia rơsĭ laih anun jơlan ter pơtruh nao rai amra jing glông jơlan phun pioh pơtrut pơđĭ kyar bruă tuh tia pơkra ming, bruă đang hmua ba yua boh thâo ia rơgơi hăng ba tuai hyu ngui logistics. Dua lĕ akŏ pơjing hăng pơđĭ kyar rơnoh pơhrui glăi pơtruh bruă ngă hmua hăng akan hơdang tui anăp ngă kual gah yŭ Dap Kơdư amra jing anih pơtum kơ bruă ngă hmua, ba yua boh thâo ia rơgơi phrâo, pơkra ming pơkĕ yua apui rơgoh hơdjă hăng jua angin, pil pơ-iă yang hrơi, bruă pơkra ming gơnam đang hmua tong ten hloh, kual gah Ngŏ amra jing anih phun pơkra ming sĭ mơdrô pơčrâo brơi logistics hăng anŏ gêh găl mơ̆ng tơlơi bơwih ƀong huă ƀơi kual ia rơsĭ”.

Bơyan puih phang akŏ thun phrâo truh laih, djă ba lu tơlơi đăo kơnang kơ sa boh tơring čar Dak Lak pơblih kơtang, anih hơmâo lŏn glai mơtah mơda hla kyâo kơpal trun nao bưp ia rơsĭ tơbung jơngeh hleč lăng ia mơtah pyiơ̆k mơ̆ng ataih, amra pok brơi jơlan tơlơi kiăng tơpưn na pơ ataih, hrun đĭ kiăng kual lŏn Dap Kơdư-kual ter hang ia rơsĭ hrŏm hơbit djă tơngan hơdai, tơkai yak hrŏm, hruo suang arap atông čing hing ang ƀơi jơlan pơđĭ kyar kơtang, hơđong kơjăp hăng bă blai tơlơi čang rơmang pơ anăp adih.