Jơlan hơdră “Bơyan bơnga gum hrŏm wai pơgang kual ia rơsĭ-Tê̆t bă blai pran khăp tơhan mơnuih ƀôn sang” pơphun pơđao pran jua, khăp pap. Hơdôm tơlơi ngui adôh suang pơpŭ kơ ia rơsĭ, bul pơtâo plơi pla, rup rap tơhan sơlup ngă tui bruă jao amăng hơdôm boh ƀattô hyu tir, anih dŏ gak, anih dưm rađar, sang DK1…hăng bơyan bơnga lŏn ia hơmâo pioh glăi lu tơlơi mơ-ak, pơgôp pơlir pran khăp ling tơhan mơnuih ƀôn sang kual ia rơsĭ, bul pơtâo, kual lŏn gah Dơnung lŏn ia ta. Đại tá Phạm Ngọc Quý-Khua anom kơđi čar kual 2 tơhan sơlup brơi thâo:

“Jơlan hơdră “Bơyan bơnga gum tơngan hrŏm wai pơgang kual ia rơsĭ-Tê̆t bă blai pran khăp tơhan mơnuih ƀôn sang” ƀrô bơyan ƀong tê̆t tui phiăn juăt hơdor tơnga hơdôm sang anŏ hăng ƀing tui hơdră djru mơng ƀon lan, anom bruă, laih dong djru brơi anung gơnam sit nik brơi sang anŏ tơhan tơnap tap. Hăng ƀing čơđai lĕ ană bă mơnuih hyu mă akan hơdang mơ̆ tơhan rông ba, jơlan hơdră anai ăt djru brơi ƀing čơđai hăng sang anŏ gơñu čơkă thun phrâo pơtum jơngum, hơmâo djop mơta. Mơng anun, ngă kjăp tui tơlơi rô nao rai gum pơgôp tơhan mơnuih ƀôn sang amăng ngă tui bruă jao thun 2026”.

Tui Đại tá Đỗ Hồng Duyên, kơ-iăng Khua anom bruă kual 2 tơhan sơlup: Jơlan hơdră “Bơyan bơnga gum tơngan wai pơgang kual ia rơsĭ-Tê̆t bă blai pran khăp tơhan mơnuih ƀôn sang” anai lĕ kiăng ƀing apăn bruă, ling tơhan hrŏm hăng mơnuih ƀôn sang djru nao rai čơkă thun phrâo, ngă lar hyu pran khăp pap, ngă pơđao pran jua bơnga bơyan amăng kual bul pơtâo plao ia rơsĭ. Mơng anun pơgôp pơtô pơblang gru grua Tê̆t tui phiăn juăt mơng djuai ania, pơtrut pran thâo djru tơdruă, thâo lăng nao rai mơng rĭm čô mơnuih apăn bruă, ƀing hlăk ai.

Pơdah pran hok mơ-ak amăng jơlan hơdră anai, yă Bùi Thị Thu Hương-Kơ-iăng Khua jơnum min mơnuih ƀôn sang să Long Sơn, ƀôn prong Hồ Chí Minh brơi thâo: Ngă tui bruă pơmut gong gai 2 gưl, tơhan sơlup lêng kơ jê̆ giăm mơnuih ƀôn sang amăng lu bruă mă:

“Anom bruă lêng kơ kiăo tui ƀing gơmơi amăng hơdôm jơlan hơdră gum hrŏm ling tơhan-mơnuih ƀôn sang, ƀing hyu mă akan hơdang tơbiă hyu kual ia rơsĭ. Anom bruă đing nao biă mă neh met wa, bơwih brơi tơlơi hơdip kơ neh met wa mơng tơlơi rơnuk rơnua amăng kual ia rơsĭ truh pơ tơlơi hơdip mơda kah hăng gơnam djru brơi”.

Ba glăi tơlơi hok mơ-ak kơ hơdôm sang anŏ tui hơdră djru, jơlan hơdră ăt pơtrut pơsur ƀing čơđai sang hră lĕ ană bă ƀing hyu mă akan hơdang hơmâo kual 2 tơhan sơlup rông ba. Amon Lê Triệu Tuấn Việt, čơđai sang hră gưl dua Bình Châu 2, hok mơ-ak brơi thâo:

“Kâo phrâo tŭ mă gơnam djru mơng ƀing neh wa, kâo hok mơ-ak biă mă. Kâo hơmâo ƀing met djru brơi lơm nao sang hră, thun rơgao kâo ăt mă hră apah bơni čơđai sang hră rơgơi. Tơdơi anai truh prong kâo kiăng ngă tơhan sơlup ƀudah ƀô̆ đô̆i, yua kâo hơmâo ƀing met djru brơi kiăng tơdơi truh prong amra djru wai pơgang rơnuk rơnua lŏn ia ta”.

Pơmĭn tui anun mơn, amai Ngô Thị Quốc, ol kơdol brơi thâo:

“Kâo hok mơ-ak biă mă hăng bơni lu kơ ƀing ling tơhan hơmâo abih pran djru brơi hăng rông ba ƀing čơđai. Rĭm bơyan bơnga trun rai, kual 2 tơhan sơlup lêng kơ juh alum hăng hơmâo gơnam djru Tê̆t brơi hơdôm sang anŏ, tơlơi anai sit nik biă mă, djru brơi sang anŏ gơmơi pla ƀiă kơtrâ̆o. Kâo ƀu hơmâo tơlơi hơget dong tah rơngiao hăng tơlơi bơni kơ tơhan sơlup, pơpŭ brơi ƀing gơñu hơmâo sang bơyan bơnga hiam drơi jăn pran jua”.

Jơlan hơdră “Bơyan bơnga gum tơngan hrŏm wai pơgang kual ia rơsĭ-Tê̆t bă blai pran khăp tơhan mơnuih ƀôn sang” anai lĕ bruă mă pơdah pran khăp pap, pơdah pran hơdip “Mơñum ia hơdor kơ pô klơi”, gru grua mơng “Ling tơhan hăng mơnuih ƀôn sang ha pran”, mơng anun tŏ tui pơsit tong tơlơi glăm ba, pran khăp hăng pran đăo gơnang mơng ƀing apăn bruă, ling tơhan kual 2 tơhan sơlup hăng mơnuih ƀôn sang hăng ƀing ană bă mơnuih hyu mă akan hơdang-ƀing mơnuih tơhrơi mlăm wai lăng kual ia rơsĭ, gum hrŏm tơhan sơlup Việt nam wai pơgang kjăp bul pơtâo plao ia rơsĭ hing ang amăng lŏn ia ta./.