HRĂ BƠNI HƠ-ƠČ THUN PHRÂO BÍNH NGỌ-2026

 MƠ̆NG KHUA MIR SIR ƠI LƯƠNG CƯỜNG

Ơ mơnuih ƀôn sang, ƀing apăn bruă, ƀing ling tơhan amăng dêh čar hăng mơnuih ƀôn sang ta dŏ pơ dêh čar tač rơngiao!

Thun phrâo bơyan bơnga Bính Ngọ truh laih, amăng mông ym pơphăn anai, thun sô laih rơgao, thun phrâo truh, Kâo bơni hơ-ơč mơ-it hiăp pơpŭ kơ abih bang mơnuih ƀôn sang, ƀing apăn bruă, ling tơhan amăng đơ đam dêh čar hăng mơnuih ƀôn sang ta pơ dêh čar tač rongiao hăng tơlơi pơpŭ thun phrâo rơnuk rơnua hiam klă, hiam drơi jăn suaih pral hăng mơak hlăk. Kâo rơkâo mơ-it truh kơ abih bang mơnuih ƀôn sang, gơyut gơyâo jar kmar hơdôm tơlơi bơni hơ-ơč pơpŭ thun phrâo hiam klă hloh, pơpŭ kơ sa thun phrâo hơmâo tơlơi mơak rơnuk rơnua, hyuk hyak mơak klă laih anun hrŏm hơbit pơđĭ kyar.

Thun Át Tỵ 2025 phrâo laih rơgao, lŏn ia ta hơmâo găn rơgao sa črăn jơlan rơbat djă pioh anŏ kơđŏm jơnum prong yom pơphăn, hơmâo boh tŭ yua yom phara hăng tŭ mă lu boh tơhnal lăp pơ-ư ang biă mă; laih dơ̆ng, ăt jing sa thun lŏn ia ta khom găn rơgao lu tơlơi tơnap tap, lông lăng, hăng anŏ pơblih hmar, tơnap hloh, ƀu dưi thâo hlâo mơ̆ng tơlơi pơhing ƀơi rŏng lŏn tơnah hăng amăng kual, hrŏm hăng tơlơi răm ƀăm lŏn adai truh kơtang, ngă răm ƀăm rơngiă rơngiom prong biă mă, pioh glăi lu tơlơi hning rơngôt, ruă nuă amăng mơnuih ƀôn sang ta.

Hăng tơlơi pơmin kơjăp, pran jua kơtang hrưn đĭ pô, abih bang amăng Ping gah, amăng mơnuih ƀôn sang, amăng ling tơhan hơmâo gum pơgôp ha pran jua, gum pran tơngan hrŏm, pơtrut tơlơi kơtang anŏ gum pơgôp djop djuai ania laih anun tơlơi djru ba mơ̆ng gơyut gơyâo jar kmar, ƀing ta hơmâo ngă giong tơhnal pơkă, bruă pơtrun lui hlâo, hơmâo lu gru kơđŏm ƀuh rơđah: Rơngai mơai, ngă pô, pơlir hơbit, hlom bom guai dêh čar, anih anom dŏ mơak rơnuk rơnua dưi pơgang hơđong; rơnoh pơđĭ kyar bơwih ƀong huă dŏ amăng khul pơđĭ kyar ba jơlan hlâo ƀơi rŏng lŏn tơnah, jing hĭ lŏn ia hơmâo rơnoh pơhrui glăi pơkă dưm dưm lu hloh; tơlơi hơdip mơda mơnuih mơnam dêh čar dưi đing nao rai djru ba djop; bruă kơđi čar, bruă mơnuih mơnam ăt hơđong; bruă pơgang lŏn ia dêh čar dưi kơjăp phik hăng kơtưn hloh; bruă pơtom hiăp, mut phung jar kmar dưi pơtrut kơtang, kơnuih hing ang, tơlơi đăo kơnang mơ̆ng Việt Nam ăt dưi pơđĭ tui amăng mông jơnum kơđi hăng jar kmar; pơjing rai atur yom pơphăn pioh kơ lŏn ia yak nao amăng rơnuk pơblih phrâo hrưn đĭ pô.

Yak nao amăng thun phrâo Bính Ngọ 2026-Thun blung a ngă tui Hră pơtrun Jơnum ruah khua ping gah dêh čar tal XIV, hăng gru grua khăp kơ lŏn ia, pran jua thâo gum pơgôp, tơlơi pơmin kơtang khăng khŏp laih anun anŏ kiăng tơlơi čang rơmang hrưn đĭ ăt kơtang hloh mơ̆n, abih bang amăng ping gah, amăng mơnuih ƀôn sang, amăng ling tơhan ta ăt amra gum pơgôp mut hrŏm sa pran jua, gum pran tơngan hrŏm mă bruă, hneč mă anŏ gêh găl, mông djơ̆ lăp kiăng găn rơgao hĭ tơlơi tơnap tap, lông lăng, pơtrut tui tơlơi kơtang hăng pran jua đăo tong ten, ngă pô, gir run, hrưn đĭ, kiăng pơ-ư ang djuai ania, ƀu pơdơi ôh bruă ngă pơblih pơčeh phrâo ia rơgơi, pơphun ngă bruă khut khăt kiăng pok pơhai tum teč ngă tui tŭ yua djop tơhnal pơkă akŏ pơdong lŏn ia Việt Nam rơnuk rơnua, rongai hơjăn, ngă pô lŏn ia, pơdrong sah, kơdrưh ang, thâo rơgơi, mơak hlak.

Amăng tơlơi mơak hrŏm hăng abih bang čơkă thun phrâo, bơyan phang bơnga lŏn ia, sa wơ̆t dơ̆ng, Kâo pơpŭ kơ abih bang mơnuih ƀôn sang, ƀing apăn bruă, ling tơhan amăng dêh čar hăng mơnuih ƀôn sang dêh čar ta dŏ pơ dêh čar tač rơngiao thun phrâo ngă bruă tŭ yua phrâo, hơmâo tơlơi dưi phrâo amăng bruă mă; djuai ania hăng mơnuih ƀôn sang ta jai hrơi mơak prong pơdrong sah, hmư̆ hing, hơmâo tơlơi hơdip mơda trơi pơđao, yâo mơak, rơngai mơai pô.

Rơkâo kơkuh bơni hăng tơlơi khăp mơak laih anun tơlơi dưi truh kih tŭ yua hloh hŏ!