VOV4.Jarai - Tơdơi kơ lu blan tơnap tap yua klin kheng Covid-19 ngă, tuai čuă ngui Dak Lăk glăk hơmâo nam rŭ glăi klă laih. Hrŏm hăng pơđĭ tui anŏ klă mơng hơdôm mơta gơnam glăk hơmâo, tơring čar glăk gir ngă phrâo hăng pơkra rai lu tui gơnam đah mơng pơhưč kơ ƀing tuai.

Mut hrŏm hăng jua mơñi mơ-ak mơng tơlơi pĕ gong atông brô̆ kual Dap Kơdư ƀơi Sang djă pioh gru đưm Dak Lăk, ơi Nguyễn Văn Sơn, tuai mơng ƀon prong Hà Nội hur har pran jua, hor biă mă. Ơi Sơn brơi thâo, ñu hmư̆ ư hăng thâo laih kual lŏn Dak Lăk amăng brô̆, tivi pôr pơthâo, samơ̆ anai jing tal blung a ñu rai ngui pơ anai. hơdôm bruă ngui ngor tui tour ngă ñu mơ-ak, pơhưč pran biă.

“Mơ-ak biă mă yơh. Mơnuih mơng kual Kơdư mut rai pơ anai lăng kual Dap Kơdư anai hiam biă, phrâo rai đôč hơmâo hmư̆ jua gong brô̆ mơng kual Dap Kơdư laih, mơ-ak kơtang kơtit, lŏn tơnah, glai klô pơ anai hiam mơn. Bruă hyu čuă ngui mơ̆ nao ngui pơ anih tui anai jing mơ-ak biă yơh, ƀing ta dưi pơdơi pơdă huăi glêh glar dong tah. Hmư̆ hing rai ngui pơ anai tlao hok biă, bưp mơnuih ƀon sang Dap Kơdư dong jing mơ-ak hloh, mưn amăng pran jua hơmâo tơlơi pơ-ư pơ-ang kơ djuai ania ta dong, ta thâo thim kual lŏn phrâo dong”.

Hơdôm hrơi rơgao, rim hrơi Sang djă pioh gru đưm Dak Lak čơkă hơdôm rơtuh wơ̆t čô tuai, djơ̆ hrơi ñu, tuai ngui tui tour truh hơdôm rơbâo čô. Ơi Đinh Một, Khua sang gru đưm Dak Lăk brơi thâo, anai jing tơlơi klă hiam, mơ-ak biă yơh yua dah tơdơi kơ sui hrơi ưt ƀu hơmâo čơkă tuai yua klin Covid-19 ngă, lơ̆m arăng brơi čơkă glăi tuai lĕ anom bruă bơwih brơi tuai hyu ngui Dak Lăk hơmâo rŭ glăi laih. Mrô tuai nao ngui amăng hơdôm hrơi rơgao ăt pơƀuh tơlơi gir run mơng anom bruă amăng bruă pơtruh nao rai hăng tuai tui lu glông pôr pơhing.

“Amăng mông hơmâo klin kheng lĕ gơmơi pơphun pơhiăp tom na nao hăng ƀing tuai amăng plang internet. Ƀing gơmơi pơphun lu bruă ƀơi glông internet, pơhmutu gơmơi pơƀuh rup gơnam, gơmơi čih tơlơi ră ruai, pơdă gơnam ƀơi anun laih anun hơmâo ƀing tuai pơhiăp nao rai amăng Fanpage hăng Youtube mơng sang djă pioh gru grua. Yua hnun mơn kơplah wah Sang djă pioh gru grua Dak Lăk hăng tuai hyu ngui dưi pơhiăp nao rai na nao, lơ̆m hmư̆ hing dưi pok bah amăng čơkă tuai lĕ tuai rai ngui mơtăm. Gơmơi ăt hơmâo mă lu tal arăng čih anăn rơkâo hlâo, tuai rai ngui jing lu biă”.

Bruă hyu čuă lăng glai klô, gru grua ƀơi Dak Lăk hơmâo lu tuai amuaih nao.

Hrŏm hăng pơtrut tui, pơđĭ kyar hơdôm gơnam pơkra kơ tuai hyu ngui, mơng akŏ thun truh ră anai, tơring čar Dak Lăk ăt gir hyu pơƀuh gơnam, pơphun jơnum bruă tuai hyu ngui hăng hơdôm boh tơring đah mơng pơtruh nao rai bruă hyu čuă ngui amăng kual hăng pơđĭ kyar hơdôm bruă hyu čuă ngui tui anih pơkă. Amăng 3 blan tal 1 truh ră anai, tơring čar hơmâo jơnum ngui sang čơ jar kmar, kĭ hră ngă hrŏm hăng hơdôm boh tơring čar Phú Yên, Bình Định, Quảng Ngãi, Gia Lai, Kon Tum ƀudah pơtruh nao rai pơkra gơnam kơ tuai čuă ngui hăng tơring čar Khánh Hòa. Yă Nguyễn Thị Lệ Thanh, Khua Gơnong bruă tuai hyu ngui tơring čar Khánh Hòa lăng yôm biă bruă pơtruh nao rai kơplah wah 2 boh tơring čar amăng bruă pơđĭ kyar tuai hyu ngui.

“Tơlơi gêh gal mơng dua boh tơring čar lĕ gơnam pơkra brơi tuai mơng dua bơnah phara, huăi dơkơnar ôh, yua hnun gơmơi ngă hrŏm klă biă. Hăng tơlơi gêh gal mơng Khánh Hòa lĕ čuă ngui ƀơi ia rơsĭ, bul pơtâo ia rơsĭ hăng hyu ngui čuă lăng glai klô mơng tơring čar Dak Lăk dong, tui anun amra ngă bruă hyu ngui hơmâo lu mơta, mơng bruă pok pơhai ngă hrŏm lĕ gơmơi čang rơmang gơnam hyu ngui hơmâo pơtruh ngă hrŏm amra ba glăi tŭ yua amăng hrơi blan pơ anăp”.

Tui tơlơi jŭ yap mơng tơring čar, amăng 3 blan tal 1 thun anai, Dak Lăk hơmâo čơkă giăm 240 rơbâo wơ̆t čô tuai rai ngui ƀơi tơring čar. Kơnong amăng blan 4, mrô tuai nao ngui pơ tơring čar đĭ lu, biă ñu amăng hrơi ngui ngor pơdơi prong, lu anih đih pơdơi, sang jưh tuai abih ƀhiao anih đih. Grup tuai hyu ngui mơng tơring čar ƀon prong kah hăng Hồ Chí Minh, Hà Nội, Quảng Ninh,...ăt ruah Dak Lăk ngă anih nao čuă ngui amăng hrơi hyu čuă ngui kual Tong krah hăng Dap Kơdư. Tui hăng ơi Đặng Gia Duẩn, Kơ-iăng khua Gơnong bruă gru grua - boh thâo hăng tuai čuă ngui Dak Lăk, hăng hơdôm tơlơi gêh gal kơ anih anom lŏn tơnah hăng gru grua djuai ania, Dak Lăk glăk gir lu biă mă đah mơng rŭ glăi bruă tuai hyu ngui.

“Sa amăng hơdôm hơbô̆ bruă abih bang tuai mơng djŏp kual lêng hor soh lơ̆m nao pơ Dak Lăk anun lĕ hyu čuă lăng lŏn ia glai klô. Dak Lăk hơmâo kơphê, hơmâo gru grua čêng hơgor hăng kual plơi pla, anih anom phara, biă ñu hơmâo gru grua rông rơman. Ră anai, tơring čar glăk pơphun bruă tuai hyu ngui jê̆ giăm hăng rơman anun jing anăn iâu đôč ăt ngă kơ arăng pơmin kiăng thâo, kiăng khŏm ƀuh mơn. Rơngiao kơ anun, ră anai hơdôm boh sang anŏ pok anih đih pơdơi homestay, farmastay djơ̆ hăng bruă hyu ngui mơtah hăng hơđong kơjăp, biă ñu pơlir hăng bruă hmua jing tơring čar ăt hơmâo tơlơi gêh gal mơn gah bruă ngă hmua, anun ăt jing tơlơi gêh gal đah mơng pơđĭ kyar bruă hyu ngui čuă lăng đang hmua amăng hrơi blan pơ anăp anai”.

Amăng 3 blan tal 1 thun anai, mrô tuai nao pơ Dak Lăk lu glăi laih.

Tơdơi kơ sui hrơi tơnap tap yua klin ngă, amăng hrơi blan dêh čar ta pơwơ̆t glăi tơlơi hơdip tui hơđăp, Dak Lăk glăk pok pơhai lu bruă đah mơng pơhưč tuai nao ngui. Hrŏm hăng pơhlôm rơnuk rơnua pơgang klin Covid-19, bruă pơhiăp tom klă hăng ƀing tuai ƀă klin F0, tơring čar ăt glăk gir pơkra rai gơnam bơwih brơi tuai lu hloh, hơmâo lu mơta gơnam hloh, laih anun dưi mă yua hơdôm tơlơi gêh gal mơng tơring čar.

H’Xíu H’mốc: Čih - Siu H’Mai: Pơblang