VOV4.Jarai - Hrŏm hăng čơđai sang hră amăng tơring čar Dak Lăk, lơ 29/8 pơ anăp anai, rơbêh 15.200 čô čơđai mơng tơring glông ƀơi guai Buôn Đôn amra sit nik mut thun hrăm phrâo 2022-2023. Mông anai, hơdôm boh sang hră glăk prăp rơmet lui djŏp anih anom, nai pơtô, čơkă ƀing čơđai hrơi mut thun hrăm phrâo mơ-ak mơ-ai.

Thun hrăm anai, Sang hră muai Họa Mi, să Krông Na, tơring glông Buôn Đôn hơmâo 12 anih hrăm, hăng360 čô čơđai, hrăm ƀơi sa boh sang hră prong, hăng 2 boh sang hră anet. Hơdôm hrơi anai, ƀing nai hơmâo kih rơmet, pơhrup glăi sang hră, lan sang kiăng hiam pioh čơkă čơđai nao pơ sang hră. Nai pơtô Lê Thị Phúc - Kơ-iăng khua sang hră brơi thâo:     

“Sang hă hơmâo pơphun kih rơmet abih bang hơdôm boh sang hră kiăng agaih. Kơ anih hrăm, gơnam yua, sang hră hơmâo lăi pơthâo hăng gong gai plơi pla djru ba. Abih bang nai pơtô hơmâo jao sang hră, ƀing nai glăi pơ sang hră pơhrup, kih rơmet agaih ƀhông kiăng lơ 29/8 anai čơkă čơđai mut thun hrăm phrâo”.

Nai pơtô anih muai rơmet, sut gơnam ngui kơ ƀing čơđai hlâo či mut thun hrăm phrâo

Rơngiao kơ prăp rơmet anih anom, gơnam yua amăng sang hră pioh pơtô hrăm, sang hră ăt lăng ba mơn bruă pơtô brơi ƀing nai kiăng kơjăp bruă hloh. Yua dah tơring glông Buôn Đôn ƀu kơnong tơnap tap yua dŏ gah guai dêh čar đôč ôh mơ̆, ƀơi anai hơmâo 50% mrô čơđai lĕ mơnuih djuai ƀiă. Sit yua tơlơi phara gah djuai ania, tơlơi pơhiăp anun khŏm kiăng ƀing nai gir hloh, pơplih mă amăng bruă pơtô hrăm, biă ñu lơ̆m pơtô tui hơdră pơtô hrăm phrâo hăng anih 1,2,3. Ơi Hồ Sĩ Lâm, Khua sang hră gưl sa Y Jut, să Krông Na, tơring glông Buôn Đôn anih hơmâo truh 80% čô čơđai lĕ ană bă djuai ƀiă, lăi tui anai:

“Mut thun hrăm phrâo sang hră sem lăng tŏng ten, biă ñu hăng anih 1,2 sang hră jao kơ ƀing nai pơtô thâo pơhiăp lu tơlơi djuai ƀiă nao pơtô, biă ñu lĕ anih 1. Amăng hrơi hrăm, čơđai aka ƀu thâo hluh đơi ôh tơlơi yuan lĕ pô nai anun pơblang glăi hăng tơlơi djuai ania ƀiă gơñu, kiăng ƀing čơđai amuñ thâo hluh ƀiă”.

Nai pơtô sang hră gưl 1 Y Jut, tơring glông Buôn Đôn kih rơmet anih hrăm pioh čơkă čơđai mut sang hră.

Tui hăng ơi Đỗ Ngọc Anh, Khua anom bruă pơtô hăng pơjuăt tơring glông Buôn Đôn, truh mông anai, hơdôm boh sang hră hơmâo prăp lui djŏp laih gơnam yua, nai pơtô. Tơring glông ră anai hơmâo 34 boh sang hră mơng anih muai truh gưl 3 hăng pơtô hrăm re se. Thun hrăm 2022-2023, hơdôm boh sang hră hơmâo rơbêh 15.200 čô čơđai, 50% mrô čơđai lĕ ană bă djuai ƀiă. Amăng anun lu biă ñu lĕ djuai ania M’nông, Êđê, Jarai...Tơlơi hơdip dŏ kơƀah biă. Yua hnun kiăng abih bang čơđai nao hrăm hră, Anom bruă pơtô hăng pơjuăt tơring glông hơmâo git gai hơdôm boh sang hră kiăng lăng ba, iâu pơthưr, djru ba ƀing čơđai, ƀu pioh hơmâo ƀing čơđai yua sang anŏ tơnap mơ̆ pơdơi sang hră. Ơi Đỗ Ngọc Anh brơi thâo:

“Anom bruă pơtô hrăm git gai hơdôm boh sang hră pơkra hơdră ngă bruă, ngă hrŏm hăng gong gai plơi pla pơhiăp tom hăng amĭ ama ƀing čơđai, nao pơ rim boh sang pơtô pơblang, iâu pơthưr kiăng ƀing čơđai pơwơ̆t glăi hrăm hră”.

Mah dŏ hơmâo lu tơlơi tơnap, samơ̆ hăng tơlơi prăp rơmet klă, hơdôm pluh rơbâo čô čơđai hăng nai pơtô ƀơi tơring glông Buôn Đôn, tơring čar Dak Lăk hơmâo prăp lui giong laih kơ thun hrăm phrâo./.

Hương Lý: Čih - Siu H’Mai: Pơblang