Tơdơi kơ ha blan pok pơhai hơbô̆ bruă gong gai ƀon lan dua gưl, Dak Lak phrâo čơkă mă tơlơi jak nao tañ amăng yua boh thâo phrâo-boh thâo măi mok, laih dong ăt dong ƀơi anăp kơ anŏ aka ƀu bơkơnar kơplah wah hơdôm boh să, phường amăng yua boh thâo phrâo hăng pơplih ngă hră pơ-ar. Tơring čar hơmâo pơgiong 96 bruă jao tui djơ̆ tơlơi pơtrun mrô 71 mơng Kơnuk kơna, laih dong ba mă yua hơdôm glông jơnum lăng nao rai mơng ataih hăng 102 boh să, phường hăng pơlăng nao rai camera krăo lăng ƀơi hơdôm anom bruă ngă hră pơ-ar amăng hơdôm boh ƀon lan.

Samơ̆, tui sit nik brơi ƀuh anih anom, gơnam măi mok yua boh thâo phrâo ƀơi Dak Lak ăt aka ƀu pơhlôm ha amăng plĕ. Lu să ăt aka ƀu hơmâo măi ruah mă mrô, anai lĕ măi mok khŏm hơmâo tui tơlơi pơkă. Mrô phara kơ hră pơ-ar rơkâo ngă mơng ataih kơplah wah hơdôm boh să, phường dŏ lu biă mă; hơmâo anih tŭ mă mơng 3-5 pok hră pơ-ar amăng rĭm hrơi. Kơ mơnuih mă bruă, ƀiă đôč mơnuih apăn bruă gưl să, phường hơmâo pơtô hrăm brơi dơlăm kơ yua boh thâo măi mok. Ră anai tơring čar Dak Lak glăk pơjing akŏ bruă pơđĭ kyar yua boh thâo phrâo-boh thâo măi mok, pơplih pơčeh phrâo hăng pơplih mrô đơ đam tơring čar kiăng ngă atur brơi rơwang pơđĭ kyar phrâo pơ anăp. Laih dong, tơring čar ăt kơtưn pel ĕp, dưm dăp mơnuih mă bruă lăp djơ̆ kiăng pơhlôm ngă tui bruă jao phrâo amăng hơbô̆ bruă gong gai dua gưl.