Thun 2024, kông ti apui lơtrik Dak Lak hơmâo jao rơbêh 318 klai prăk kiăng ngă tui 126 akŏ bruă tuh pơ alin pơkra ming glông hrĕ apui lơtrik. Bruă pơkra phrâo rơbêh 150 km glông hrĕ apui lơtrik trung áp, 345 km glông hrĕ apui lơtrik hạ áp, 196 trạm biến áp hăng pơkra ming hơdôm hơpluh trạm biến áp hrŏm hăng anih pơkŏn dong. Lain dong, kông ti ăt đing nao pơgiong dưm truă boh thâo phrâo, măi mok pơđuăi apui lơtrik phrâo…hăng tơlơi gơgrong, amăng 7 blan rơgao, anom bruă apui lơtrik Dak Lak hơmâo pơgiong 20 ring bruă, mă yua rơbêh 1/3 rơnoh prăk amăng ha thun.

Hơdôm akŏ bruă pok prong, pơkra ming glông hrĕ apui lơtrik hăng hơdôm trạm biến áp hơmâo pok pơhai, pơhlôm hơđong amăng mă yua, ngă gêh gal amăng bruă pơđĭ kyar bơwih ƀong mơnuih mơnam. Ră anai gơnong bruă apui lơtrik glăk gir run gum hrŏm hăng djop ƀon lan pơsir hĭ hơdôm tơlơi gun amăng pơhrui lŏn mơnai kiăng pơtrut tañ bruă man pơkra tui akŏ bruă hơmâo prăk tuh pơ alin.