Anai lĕ, sa amăng hơdôm boh yôm phun dưi hơmâo Khul khua git gai tal pơplông abih anih 12 thun 2023 tơring čar Dak Lak hơmâo lăi pơtong amăng mông jơnum lăi pơthâo hăng ƀing čih tơlơi pơhing, yua hrơi mông tal pơplông abih anih 12 ƀiă truh laih. Tal pơplông thun anai, đơ đam tơring čar Dak Lak hơmâo rơbêh 21.000 čô mơnuih čih anăn pơplông, amăng anun, mrô čơđai sang hră mơnuih djuai ƀiă lĕ 28%. Kơ mrô anih pơplông, hơmâo 33 boh anom sit nik hăng 900 boh anih mut pơplông.

Truh ră anai, djop sang bruă hơmâo prăp lui djop gơnam yua mă bruă ƀơi djop anih pơphun pơplông, anih in hră čih tơña pơplông, anih čom puang hơmâo ngă djơ̆ tơlơi phiăn pơtrun. Lăi glăi tơlơi tơña kơ anŏ hŭi bơngơ̆t mơ̆ng čơđai sang hră, amĭ ama čơđai sang hră tơdơi kơ hơmâo tơlơi kơsung ngă sat ƀơi dua boh sang să amăng tơring glông Čư̆ Kuin, Khul khua mua git gai pơplông brơi thâo, bruă mă pơtô lăi, pôr tơlơi pơhing hơmâo pơtrut pơsur pran jua kiăng abih bang hơđong nao pơplông. Laih dơ̆ng lăi pơtong, hơmâo prăp lui tong ten laih, pơgang rơnuk rơnua kơ hơdôm hrơi či pơplông anun.