Rơđah biă ñu, ƀơi jơlan Hồ Chí Minh črăn găn phường Quảng Thành, plơi prong Gia Nghĩa, bơnah gah plăng pơgang amăng lăm rơbêh kơ 3m. Nam tơhlom prong tui, amra bơbeč truh năng ai ñu 100 bôh sang anô̆ mơnuih ƀôn sang. Ƀơi kual guai dêh čar să Quảng Trực, tơring glông Tuy Đức, nam čơđang lŏn, lŏn tơhlom ăt prong tui dong, hăng hmâo dong sa nam čơđang phrâo, ataih năng ai ñu 80m.

Gong gai tơring glông hmâo ba đuăi laih 66 bôh sang anô̆ mơnuih ƀôn sang hơdôm bôh ƀôn Bu Krăk, Bu Prăng, guang kual pơgăn ƀu pioh mơnuih ƀôn sang mut nao amăng kual huĭ rơhyưt. Kơtang hloh lĕ ƀơi bơnư̆ kŏng ia Dak N’ting, să Quảng Sơn, tơring glông Dak Glông, bơnư̆ hnoh ia hmâo laih lu nam čơđang jôh ƀê tông bơnư̆ gah hlâo hăng tơkai ia, amra pơčah bơnư̆ ia Dak N’ting. Tơdơi kơ hyu pel ĕp ƀơi hơdôm anih lŏn tơhlom, lŏn tơhroh, amăng mông jơnum lơm lơ 5/8, Khua Jơnum min mơnuih ƀôn sang tơring car Dak Nông rơkâo hơdôm gơnong bruă, tơring glông đing nao pel ĕp, hmao ba đuăi mơnuih ƀôn sang mơ̆ng anih amra hmâo tơlơi truh. Gơnong bruă jơlan nao rai tơring čar Dak Nông hăng gong gai plơi prong Gia Nhĩa hmâo ngă laih plăng pơgang, hlă hnal lăi pơthâo kual huĭ rơhyưt lŏn tơhroh, hnal lăi pơthâo hơdư̆ rơdêh nao rai jơlan wer Gia Nghĩa (jơlan prong 14 hăng jơlan mrô 28)./.