VOV4.Jarai - Dong mơng akŏ thun truh ră anai, kông ti apui lơtrik Dak Nông hơmâo pơkra rai 375 klăk kWh apui lơtrik mă yua, đĭ 2,5% pơhmu tui tơđar thun 2021; rơngiă hrŏ trun, pơhrui rơgao hăng mrô pơkă. Hơmâo laih giăm 160.000 čô mơnuih duh prăk apui lơtrik tui plang sang bruă prăk hăng hơdôm anom bruă djru ba (hăng mrô rơbêh 95%). Apui lơtrik ƀơi Dak Nông mă yua jai hrơi jai hơđong, djơ̆ hăng tơlơi rơkâo pơđĭ kyar bơwih ƀong huă mơnuih mơnam ƀơi ƀon lan.

Kông nhơn anom bruă apui lơtrik Đắk R’lấp pel ĕp hrĕ apui lơtrik

Amăng 8 blan laih rơgao, đơ đam tơring čar hơmâo ĕp ƀuh hăng pơsir hĭ 676 bruă ngă soh lơ̆m yua apui lơtrik, pơphun pơhrui glăi hăng phak prăk abih tih 550 klăk prăk. Hơdôm anom bruă apui lơtrik ƀu pơdơi pơplih phrâo, pơtrut mă yua boh thâo phrâo amăng wai lăng, pel ĕp, krăo lăng kiăng pơhlôm bruă sĭ mă yua apui lơtrik klă hloh.

Siu Đoan: Pơblang