Truh ră anai, tơring čar Dak Nông phrâo brơi čan aka truh 50% rơnoh prăk tuh pơ alin kơ bruă čar jao amăng thun 2024. Pơtrut kơtang amăng bruă anai, Khua Jơnum min mơnuih ƀôn sang tơring čar Dak Nông hơmâo git gai pơphun dăp hơdră, hơmâo akŏ bruă nao ĕp lăng ƀơi djop anih hơmâo kơčăo bruă mơ̆ mrô brơi čan prăk dŏ ƀiă đơi. Tui hăng akŏ bruă, amăng dua wơ̆t hrơi tơjuh pơ anăp, Jơnum min mơnuih ƀôn sang tơring čar Dak Nông amra pơphun 2 grup hyu sem lăng, yua khua hăng kơ-iăng tơring čar ba akŏ, nao ĕp lăng ƀơi 11 kơčăo bruă či tơring glông Dak Mil, Čư̆ Jut, Dak Rlâp, Krông Knô hăng plơi prong Gia Nghiã.

Anai lĕ hơdôm kơčăo bruă tuh pơ alin kơ bruă čar, čuk pơkra jơlan, man pơkra bơnư̆ pơkong ia,yom biă mă amăng bruă pơđĭ kyar bơwih ƀong huă mơnuih mơnam ƀơi tơring glông, plơi pla, samơ̆ hơnơ̆ng mă bruă rơnang, blang, ba yua prăk kăk tuh pơ alin ƀiă đơi. Lơ̆m nao ĕp hrŏm hăng bruă jŭ yap lăng tong ten, pơtong glăi tơlơi tơnap tap gun gan, lơ̆m pok pơhai kơčăo bruă pioh hơmâo hơdră pơsir djơ̆ lăp, pel ĕp djop anom bruă tuh pơ alin, boh nik ñu tơlơi glăm ba mơ̆ng pô ngă khua. Jơnum min mơnuih ƀôn sang tơring čar Dak Nông amra pơsir khut khăt djop anom bruă, mơnuih ngă khua hlơi pô ñu ngă gun bơtơnap amăng bruă mă, mơnuih mă bruă ƀu khin glăm ba, ƀu hơmâo tơlơi gơgrong sit nik, tơl ngă kaih pok pơhai kơčăo bruă. Hơdôm kơčăo bruă ƀu anăm ngă tui, Jơnum min mơnuih ƀôn sang tơring čar Dak Nông khom pơsir khut khăt ƀư̆ pơkra glăi rơnoh prăk, jao kơ kơčăo bruă hlơi ngă tui klă hloh.