VOV4.Jarai - Tui hăng Gơnong bruă Mơnuih mă bruă - Tơhan rơka hăng Mơnuih mơnam tơring čar Dak Nông, ƀrô hrơi Tê̆t Nhâm Dần 2022, tơring čar Dak Nông hơmâo pơphun hyu čuă, brơi rơbêh 73.000 anung gơnam kơ hơdôm anom bruă, mơnuih mă bruă rơgơi, sang anŏ kơnuk kơna juăt djru, sang anŏ hơkrŭ lŏn ia. Prăk djru hơmâo rơbêh 33 klai prăk mă mơng prăk Kơnuk kơna ta, amăng anun rim anung gơnam hơmâo nua mơng 300.000 truh 1 klăk prăk tui hluai pô mơn. Rơđah biă ñu, ƀing hơmâo mă gơnam pơpŭ Tê̆t lĕ: Mơnuih hơkrŭ lŏn ia, sang anŏ tơhan djai pơsăn drơi, sang anŏ rin djuai ƀiă; ƀing hơmâo kơnuk kơna čem rông, lăng ba; ƀing khua pơdơi bruă thun tha; sang anŏ hơmâo ană bă glăk ngă bruă ƀơi Trường Sa, Anih khuer ia jâo DK 1; plơi pla mơnuih djuai ƀiă. Ơi Y Long - Kơ-iăng khua Gơnong bruă Mơnuih mă bruă - Tơhan rơka hăng Mơnuih mơnam tơring čar Dak Nông brơi thâo:

“Ping gah, Kơnuk kơna lăng ba na nao kơ neh met wa. Pơhmutu amăng hrơi tê̆t anai, tơring čar Dak Nông hơmâo brơi kơ rim boh plơi 10 klăk prăk kiăng ană plơi ƀong tê̆t. Hlâo adih, brơi aka ƀu djŏp, samơ̆ thun anai hơmâo jao kơ să lăng glăi rim boh sang. Tơdơi kơ anun, hluai tui hơdôm anom bruă wai lăng djuai ania mơnuih mơnam, khul ia jrao kyâo bơrơkal mriah tơring glông lăng glăi abih sang anŏ rin djơ̆ hă aka. Tơdah dŏ kơƀah lĕ jao kơ hơdôm boh plơi lăng glăi dong, ƀu dưi pơgao lui sang anŏ hlơi ôh”.

Siu H’Mai: Pơblang