VOV4.Jarai - Kiăng kơ bĕ hĭ hơdôm tơlơi truh sat lơ̆m yua apui lơtrik, sit biă ñu amăng bơyan hơjan kơthel, hơdôm anom bruă apui lơtrik Dak Nông gum hrŏm hăng gong gai ƀon lan, djop anom bruă, khul grup ƀơi ƀon lan pơphun lu tal hyu pơtô pơblang kiăng yua apui lơtrik rơnuk rơnua. Amăng hơdôm tal hyu pơtô pơblang, mơnuih ƀon sang hơmâo arăng lăi pơthâo hơdôm anŏ juăt ƀuh ngă hŭi rơhyưt lơ̆m yua apui lơtrik, črâo brơi bruă yua apui lơtrik amăng sang anŏ, hơdôm hơdră pơgang pơgăn, kiăng kơ huăi apui ƀong yua apui lơtrik ngă.

Kông nhơn PC Dak Nông ba hyu hră pơ-ar lăi pơthâo kơ bruă yua apui lơtrik rơnuk rơnua

Anom bruă apui lơtrik ăt gum hrŏm hăng gong gai ƀon lan pơsur mơnuih ƀon sang hyu koh hĭ than kyâo hŭi joh ngă tơ̆i hrĕ apui lơtrik, anăm pla kyâo giăm hơdôm hrĕ apui lơtrik cao áp. Laih dong, gơnong bruă apui lơtrik hơmâo ba hyu rơbêh 1.000 pok hră pơ-ar kiăng kơ lăi pơthâo kơ bruă yua apui lơtrik rơnuk rơnua. Hrŏm hăng bruă pơtrut pơtô pơblang, anom bruă apui lơtrik Dak Nông ăt đing nao tuh pơ alin, dưm truă klă ƀiă dong, sit biă ñu hơdôm hrĕ apui lơtrik hạ áp amăng plơi pla.

Siu Đoan: Pơblang