Hră lăi pơthâo amăng mông jơnum brơi ƀuh, 6 blan rơgao, rơnoh pơđĭ kyar bơwih ƀong huă ƀơi tơring čar Dak Nông dưi hơmâo 5,23%, ƀiă hloh pơkă hăng akŏ bruă lĕ 7,5%. Prăk duh jia pơhrui glăi hơmâo năng ai 1.550 klai prăk, hrŏ trun 20,5% pơkă hăng tal anai mơ̆n thun hlâo. Bruă yua prăk tuh pơ alin mơ̆ng tơring čar dŏ kaih, pok pơhai lu hơdră bruă tơhnal pơtrun mơ̆ng dêh čar bưp lu tơlơi gun yua tơlơi phiăn pơkă. Lơ̆m anun, hnong pơkă, kăng pơpha mă yua lŏn dŏ kaih, pơkă anih mă eh pơsơi Bosit bơbeč prong biă amăng tơlơi bơwih ƀong huă mơnuih mơnam amăng tơring čar.

Pơhiăp ƀơi mông jơnum, ơi Lưu Văn Trung, Khua Jơnum min khul pơ ala mơnuih ƀôn sang Dak Nông rơkâo, ƀing pơ ala mơnuih ƀôn sang ƀơi tơring čar khom lăi pơthâo phun ñu ba truh bruă ngă kaih, biă mă ñu phun ñu bruă ngă aka thâo bruă, tơlơi dŏ kơƀah amăng bruă ba yua prăk tuh pơ alin kơ bruă čar. Mơ̆ng anun, ba tơbiă hơdră pơsir hĭ, pơtrut tañ bơwih ƀong huă mơnuih mơnam tơring čar.