VOV4.Jarai - Kông ti apui lơtrik Dak Nông glăk pơhun ngă lu kơčăo bruă apui lơtrik amăng plơi pla, gir kiăng abih bang să dưi ngă hơnong pơkă mrô 4 kơ apui lơtrik plơi pla phrâo laih anun 100% mrô sang anŏ hơmâo apui yua klă. Thun 2022, apui lơtrik Dak Nông wai lăng pơkra 53 ring bruă ngă phrâo, 22 ring bruă pơkra glăi hăng mrô prăk rơbêh 150 klai prăk. Hrŏm hăng tuh pơ plai pơkra apui yua, kông ti ăt pơtrut ngă bruă čơkă mă hrĕ apui jua tơdu mơng hơdôm anom bruă ƀơi tơring čar.

PC Dak Nông pơkra ming apui yua amăng plơi pla

Anom bruă hơmâo tŭ mă 6 anom ngă ƀong hrŏm bơwih brơi apui yua hăng rơbêh 120 km glông hrĕ, 9 anih pơkĕ jua apui đĭ trun, pơplih klă apui yua bơwih brơi rơbêh 17.000 boh sang anŏ. Mah anih dăng hrĕ apui ƀu hiam ôh, nao rai tơnap, samơ̆ truh ră anai abih bang plơi pla ƀơi Dak Nông lêng hơmâo apui yua amăng sang anŏ wơ̆t hăng pơkra pơjing gơnam tam, mrô sang anŏ hơmâo mă yua apui rơbêh 99%. Hrŏm hăng bruă tuh pơ plai man pơkra, pơkra ming hiam apui lơtrik, anom bruă apui lơtrik Dak Nông ăt gơñăm ngă klă tui bruă mă yua, ngă hră pơ-ar amuñ mơn, mă yua boh thâo phrâo bơwih brơi mơnuih ƀon sang jai hrơi klă hloh.

Siu H’Mai: Pơblang