VOV4.Jarai - Mơguah lơ 27/5, Jơnum min mơnuih ƀon sang tơring čar Dak Nông pơphun Jơnum pơplih anih tuh pơ plai sĭ mơdrô, hơmâo anom bơwih ƀong prong, khua mua hơdôm gơnong bruă, khua pơ ala anih sĭ mơdrô hăng boh thâo măi mok Việt Nam (VCCI) hăng pô pơ ala kơ hơdôm boh tơring čar dong mrô 1 kơ mrô dưi pơhno gưl tơring čar. Thun 2021, PCI mơng tơring Dak Nông dong mrô 52/63 boh tơring čar, ƀon prong amăng dêh čar, đĭ 8 wơ̆t pơhmu hăng thun 2020, rơgao 7 wơ̆t pơhmu hăng hơnong pơkă ba tơbiă. Anai ăt jing mrô prong hloh ƀơi tơring čar dưi ngă amăng 5 thun giăm anai.

Anih jơnum

Mơng blung a mơtăm, tơring čar Dak Nông lăng glăi abih tơlơi tơnap amăng bruă tuh pơ plai sĭ mơdrô, pơhmư̆ tơlơi pơgôp hiăp mơng hơdôm anom bơwih ƀong. Khua Jơnum min mơnuih ƀon sang tơring čar Dak Nông ơi Hồ Văn Mười pơsit gir run hloh dong, pơđĭ tui mrô PCI thun 2022 hăng hơdôm thun pơ anăp dong, pơhlôm dưi ngă, ngă klă hloh; ngă brơi anih tuh pơ plai sĭ mơdrô amuñ ƀiă, rơđah rơđông, kiăng anom bơwih ƀong hơđong pran jua mă bruă hơđong hăng đĭ kyar.

Siu H’Mai: Pơblang