Tui tơlơi lăi pơthâo glăi mơng Grŭp git gai pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar Dak Nông, hơdôm blan akô̆ thun anai, ƀơi tơring čar anai hmâo lu tal hơjan prong kruah yâu pok bơbung sang hăng ngă răm rai lu phun pla mơng mơnuih ƀôn sang, yap him lăng răm rai hmâo mơn rơbêh kơ 3 klai 200 klăk prăk.

Bơ̆ amăng bơyan hơjan thun hlâo, ƀơi tơring čar hmâo 5 tal hơjan prong hmâo tom kruah yâu kơtang, ngă răm rai sang dô̆, kông ngăn, phun pla hăng anih anom mă yua, lu anih lŏn tơhroh ƀơi sa dua bit anih... răm rai năng ai ñu 148 klai prăk. Pơkă hlâo bơyan hơjan thun anai, ayuh hyiăng ngă tơnap dong, ƀu thâo him lăng hlâo, Jơnum min mơnuih ƀôn sang tơring čar Dak Nông hmâo črâo ba hơdôm anom bruă, plơi pla pel ĕp glăi, lăi pơthâo, pơhrua nao hơdôm jơlan gah pơgang, pơgăn hơjan ia ling dăo lăp djơ̆ hăng tơlơi rơđah rơđông./.