Tui hăng Jơnum min mơnuih ƀôn sang plơi prong Gia Nghiã, tơring čar Dak Nông tal hơjan hlim phrâo anai ngă rai ia ling dăo lu bit anih, boh ƀiă 64 boh sang ia lip hĭ, lu biă mă ƀơi hơdôm phường: Nghĩa Tân, Quảng Thành, Nghĩa Trung. Hrŏm hăng anun, hơmâo lu dram gơnam, boh troh đang hmua ăt bơbeč yua. Amăng anun, hơmâo rơbêh 40 boh sang ia ling dăo kơtang truh mơkrah met. Ayong Trần Văn Hoàng, dŏ ƀơi ƀut 2, phường Nhgĩa Tân, plơi prong Gia Nghĩa, brơi thâo, ia ling dăo ngă kơ ñu aka ƀu dưi glăi pơ sang ñu pô ôh laih anun aka ƀu thâo mơ̆n rơnoh răm ƀăm hơdôm pă.

“Lơ̆m ƀuh sang anŏ ieo gah, ia đĭ lip truh pơ bah amăng adơi ayong ƀing gơmơi hyu gum djru nao rai pơdŭ pơgiăng đuăi gơnam nao pơ anih dlông hloh ƀơi sang met Năm. Truh 8 mông mơmŏt lĕ ia đĭ truh pơ sang met Năm baih, lơ̆m ia lip blai hang, lơ̆i rơgao tơdrông tua găn jơlan, sang met Năm ia lip 40 cm,  ƀing adơi ayong dưm gơnam amăng sang met Năm mơ-it pơ anun yơh ƀơi anih dlông hloh”.

Ơi Thạch Cảnh Tịnh, Kơ-iăng Khua jơnum min mơnuih ƀôn sang plơi prong Gia Nghĩa, brơi thâo, hlâo kơ hơmâo tơlơi truh ia lip, khua mua plơi prong hơmâo git gai djop să, phường, ling tơhan djop sang bruă kơnuk kơna prăp lui pơpha mă bruă, ngă hrŏm pioh pơdŭ đuăi gơnam mơnuih ƀôn sang nao dŏ pơ anih rơnuk rơnua.

“Abih bang sang anŏ mơnuih ƀôn sang pơ kual gah tơkai ia lĕ ƀing gơmơi hơmâo lăi pơthâo hlâo laih hăng djru pơdŭ brơi dram gơnam ba nao pơ anih ƀơi kơdư dlông hloh, samơ̆ ia lip kơtang đơi, ia prong hloh tơđar thun anun yơh dram gơnam mơnuih ƀôn sang pơ kual gah yŭ bơbeč yua. Ră anai, ƀing gơmơi hlăk jŭ yap glăi abih bang anih hơmâo tơlơi hŭi ia ling dăo truh, biă mă ñu ter hang ia Dak Nông: plơi Nâm Ră, să Dak Nia, phường Quảng Thành, pơ hlao ia dơnao adih ăt jing anih hŭi rơhyưt mơ̆n”.

Ăt ƀơi tơring čar Dak Nông, ia ling dăo hlăk truh ƀơi hơdôm să Dak Rmăng, Quảng Hòa, tơring glông Dak Glong hlong pơgăn jơlan nao rai ƀu thâo truh dơ̆ng tah. Ƀơi anăp tơlơi tơnap tap hơjan hlim kơtang, khua mua jơnum min mơnuih ƀôn sang tơring čar Dak Nông nao sem lăng ƀơi anih ia lip amăng plơi prong Gia Nghĩa. Ƀơi anih nao ĕp, ơi Lê Trọng Yên, Kơ-iăng Khua Jơnum min mơnuih ƀôn sang tơring čar Dak Nông pơtrun hiăp brơi sem lăng tong ten, prăp lui hơdră pơhlôm, pơgang tui bruă mă 4 mơta sa anih, pơgang hơđong mơnuih ƀôn sang hăng dram gơnam mơ̆ng mơnuih ƀôn sang:

“Biă mă ñu amăng bruă pok pơhai ia mơ̆ng dơnao pơkŏng, ngă hrŏm pô anom bruă wai lăng djop kông ty apui lơtrik hăng dơnao pơkŏng ia khom pok pơhai ia rô rơnuk rơnua. Ƀing gơmơi ăt khom pơtong rơđah, lăng tui amăng bruă mă hơdôm wơ̆t tom hơmâo tơlơi truh mơ̆ng thun 2018 ƀơi Dak Sin tơring čar Dak Nông hăng ƀơi tơring čar Lâm Đồng phrâo anai, kiăng pơkra hơdră mă bruă gêh găl, ngă hiư̆m pă khom pơgang tơlơi rơnuk rơnua hơđong kơ mơnuih ƀôn sang, anăm hơmâo tơlơi truh sat kơ mơnuih, wơ̆t dram gơnam mơnuih ƀôn sang. Pơpha mơnuih mă bruă kah hăng ječ ameč mông blah ngă mơtam, hrơi mlam hai git gai, lăi pơthâo hmar hmao kru, kiăng mơnuih ƀôn sang pơhlôm pơgang mă pô laih anun dram gơnam sang anŏ gơñu, hơdôm anih hŭi rơhyưt lŏn tơhlŏm, biă mă ñu pơ kual gah tơkai ia”.

Ƀơi tơring čar Dak Lak, lu hrơi laih rơgao ăt hơjan hlim kơtang, ia đĭ prong mơ̆n, ling dăo lu đang hmua, phun pla ƀơi tơring glông Krông Ana, Krông Bông, Lak hăng Ea Sup. Ƀing tơhan djop sang bruă kơnuk kơna hlăk ngă hrŏm mơnuih ƀôn sang pơgang ia dong amăng hmua, hŭi răm phun pla, laih dơ̆ng yuă pơdai ƀơi hmua pơdai tơsă hnuăl kiăng plai ƀiă pơdai brŭ hiă.

Ƀơi hơdôm să Ƀuôn Tría, Ƀuôn Triết, Dak Liêng, tơring glông Lak hăng hơdôm să Quảng Điền, Dur Kmăl, tơring glông Krông Ana ter hang ia krông Ana, ia ling dăo abih 2000 ha hmua pơdai. Ơi Phi Văn Mỹ, să Quảng Điền, tơring glông Krông Ana, hơmâo rơbêh 1 ha hmua pơdai, brơi thâo:

“Hơjan mơ̆ng akŏ bơyan mơyan ia ling dăo yơh. Lu đang hmua hlăk amăng hrơi blan hroh, ră anai răm ƀăm soh sel, hơdôm hmua pơdai tơsă rak tui mơ̆ng 20-30% lĕ gir yuă ba glăi tañ”.

Tơlơi pơhing hơjan hlim amăng tơring glông, tui hăng ơi Nguyễn Minh Đông, Kơ-iăng khua Jơnum min mơnuih ƀôn sang tơring glông Krông Ana, pôr pơthâo:

“Ia mơ̆ng ia krông ră anai kơtang biă mă, blai hang, lip truh pơ king hmua ƀơi plung dơnung ƀiă. Yua kơ anun, ră anai, Jơnum min mơnuih ƀôn sang tơring glông hlăk git gai djop să, plơi pla ngă tui 4 mơta bruă sa anih pơsir hmao kru, hơdôm anih hơmâo măi ƀôp ia, gir ƀôp ia pơtơbiă pơđoh hĭ pơrơngiao kiăng huăi ia dong mlĕp, djop anom bruă ăt nao djru mơnuih ƀôn sang pơgang tơlơi răm ƀăm ia ling dăo ngă”.

Tui hăng rơnoh jŭ yap mơ̆ng Khul git gai pơhlôm pơgang tơlơi truh lŏn adai ngă hăng hơduah ĕp mơnuih hơmâo tơlơi truh tơring čar Dak Lak, amăng tơring čar hơmâo 1 boh sang dlưh hĭ, 128 boh sang ia lip, rơbêh 5000 ha hmua ia dong, lu ring bruă jơlan glông, bơnư̆ pơkong ia răm rai. Ơi Mai Trọng Dũng, Kơ-iăng Khua Gơnong bruă Đang hmua hăng Pơđĭ kyar plơi pla tơring čar Dak Lak lăi nao kơ bruă pơhlôm, pơgang tơlơi truh ia ling dăo ngă hăng bruă djru ba mơnuih ƀôn sang.

“Kơnang kơ hơdră bŏng glăi tơlơi truh lŏn adai ngă, djop plơi pla hơmâo ngă hrŏm hơdră tui hluai anŏ gêh găl hăng prăp lui djru mơnuih ƀôn sang amăng anih ia lip, ia ling dăo. Amăng anun, hơdôm kual ia ling dăo amăng lăm king hmua bơnư̆ pơkong, khom ƀôp ia pơđoh nao pơrơngiao bơtơbiă trun amăng ia krông kiăng plai ƀiă răm ƀăm đơ đam hmua ia dong; hơdôm anih plung dơnung hmua pơdai tơsă rak laih khom nao yuă pơdai, djru mơnuih ƀôn sang hơmâo hơdră “Ba glăi mơtah pơ sang tŭ mơ̆n klă hloh lui tơsă hĭ pơ hmua ia hlăk dong” đah mơ̆ng plai ƀiă răm ƀăm pơdai hmua yua tơlơi truh lŏn adai ngă.