Dak Nông hrŏ trun mrô sang anŏ ƀun rin tañ hloh amăng kual Dap kơdư. Anai lĕ tơlơi pơhing hơmâo đing nao hloh amăng Jơnum ƀing pơ ala djop djuai ania tơring čar Dak Nông tal IV, thun 2024 pơphun mơguah tom brơi (15/10) hơmâo tơlơi mut hrŏm mơng 250 čô mơnuih pơ ala brơi 227 rơbâo čô mơnuih djuai ania ƀiă đơ đam tơring čar. Rơwang thun 2019-2024, hrŏm hăng hơdôm jơlan hơdră, hơdră bruă mơng gơnong glông, tơring čar Dak Nông hơmâo mă yua ha wŏt, pok pơhai lu jơlan hơdră, akŏ bruă tuh pơ alin man pơkra anih anom, hơmâo lu tui hơdră bơwih ƀong, pơđĭ kyar hơbô̆ bruă pơhrŏ trun ƀun rin, pơsir hĭ hơdôm bruă kơƀah lŏn dŏ, sang dŏ, lŏn ngă hmua.

Mơng anun, mrô sang anŏ ƀun rin kual djuai ania ƀiă tơring čar Dak Nông hrŏ trun mơng 30,14% thun 2019 dŏ 13,24% amăng rơnuč thun 2023. Tui ơi Ngô Thanh Danh, Khua git gai Ping gah tơring čar Dak Nông, bruă djuai ania hăng bruă ngă tui hơdôm hơdră djuai ani amăng ƀon lan hơmâo ba glăi boh tŭ yua klă. Rơwang pơ anăp, tơring čar Dak Nông gir run pơhrŏ trun mrô sang anŏ ƀun rin dŏ 10%; 70% mrô să kual mơnuih djuai ania ƀiă hăng kual čư̆ siăng đĭ plơi pla phrâo.