VOV4.Jarai - Phrâo anai, Jơnum min mơnuih ƀon sang tơring čar Dak Nông pơphun jơlan hơdră jơnum pơčrông sai bruă “Pơđĭ kyar bơwih ƀong huă mơnuih mơnam tơring čar Dak Nông” jơnum bưp ƀơi anăp hăng lăng nao rai amăng tivi tom ƀing rơgơi kơhnâo Sang bruă kơsem min pơđĭ kyar Phương Đông.

Hlâo kơ hrơi jơnum, ƀing khua hơmâo nao lăng ƀơi sa, dua anih gah Đang lŏn tơnah pơtâo čuah UNESCO Dak Nông, hơbô̆ bruă bơwih ƀong ƀơi tơring čar, sem lăng hră pơ-ar kơ bruă dưm dăp pơđĭ kyar bơwih ƀong huă mơnuih mơnam mơng tơring čar. Ƀơi kual dơnung Dap Kơdư pơtruh nao hăng kual Đông Nam Bộ, tơring čar Dak Nông hơmâo bô xit lu hloh ƀơi rŏng lŏn tơnah, jing tơring čar nao hlâo amăng dêh čar ta kơ bruă pơđĭ kyar apui lơtrik kah hăng apui lơtrik hrĭp pơ-iă yang hrơi, apui lơtrik pơkra mơng jua angin. Hơmâo rơbêh 380.000 ektar lŏn, lêng kơ lŏn mriah bazan hiam biă, hơmâo ia lu mơn, ayuh hyiăng lŏn adai ƀơi anai lăp djơ̆, dưi pla lu djuai phun sui thun, phun boh troh, pơđĭ kyar bruă rông bui mơnŭ. Lu anih anom hiam, hơmâo čư̆, hơmâo ia čroh hiam, biă ñu hơmâo čư̆ apui kơdir glông hloh ƀơi kual Đông Nam Á, hăng lu mơnuih ƀon sang djuai ƀiă dŏ djă pioh gru grua hiam mơng đưm hlâo...

Ƀing khua nao lăng ƀơi dơnao ia Tà Đùng

Ƀing rơgơi kơhnâo lăi, Dak Nông hơmâo lu tơlơi gêh gal phara kơ lŏn tơnah, ayuh hyiăng, jing kual lŏn dưi pơđĭ kyar sui thun. Tơlơi ngă gun hĭ amăng bruă pơđĭ kyar lĕ jơlan nao rai aka ƀu hiam, bơwih ƀong anet, ngă hmua aka ƀu pơplih tui rơnuk phrâo, mơnuih mă bruă aset mơn...Kiăng dưi pơsit brơi tơlơi kiăng khăp ba Dak Nông pơđĭ kyar, Nai prin tha Trình Quang Phú - Khua anom bruă, Khua khul boh thâo Anom bruă kơsem min pơđĭ kyar Phương Đông lăi rơđah, rơngiao kơ bruă pơsir brơi tơlơi ngă gun, Dak Nông kiăng pơƀuh rup, ngă pơhưč kiăng abih bang anih amăng dêh čar hăng čar rơngiao thâo kơ tơring čar anai, hăng tơlơi adoh soang, boh hră, pơdah phim...

“Amăng hơdôm mơta tơlơi anai lĕ kâo kơnong kiăng ƀing gih lăng nao bruă pơƀuh rup, ngă pơhưč, pôr pơthâo mơng ƀing ta aset đơi. Ƀing gơmơi hlâo či rai pơ anai lĕ brơi adơi ayong pok lăng abih amăng plang internet, sem lăng hơmâo tơlơi čih pơhing hơget mơn, samơ̆ ƀu hơmâo ôh, aset biă”.

Nai tha prin prin tha Trình Quang Phú lăi nao bruă pôr pơhing, pơƀuh rup kơ Dak Nông.

Nai prin tha Trần Du Lịch, mơnuih rơgơi bruă bơwih ƀong, Kơiăng khua hơđăp grup khua pơ ala mơnuih ƀon sang ƀon prong Hồ Chí Minh lăi, hăng lu tơlơi gêh gal phara, Dak Nông dưi hrưn đĭ kơtang lơ̆m hơmâo hơdră ngă bruă pơhưč arăng tuh pơ plai prăk kăk.

“Khŏm pơdah pơƀuh tơlơi čang rơmang kơtưn đĭ kyar mơng Dak Nông hluai tui hơdôm tơlơi gir run ngă pơhưč arăng tuh pơ plai prăk kăk mơng dêh čar ta hăng čar rơngiao, pơjing rai bruă tuh pơ plai lu hloh amăng abih bruă bruă ngă. Ƀing gih khŏm jak iâu pô nao ba akŏ amăng rim anom bruă, pơjing brơi tơlơi gêh gal, bơ kâo lăi hlâo kiăng bĕ hĭ hơdôm mông jơnum hơmâo lu pô tuh pơ plai prăk kăk rai lăng samơ̆ či PR (pơƀuh kiăng arăng thâo anăn đôč) ƀu hơmâo pô ngă ôh. Tal dua lĕ khŏm pơđĭ tui tơlơi rơgơi ngă pơhưč arăng djru prăk, yua dah PCI mơng Dak Nông aset đơi; kơ bruă bơwih brơi lĕ ngă hiư̆m pă ƀing khua mua khŏm pơƀuh pơdah thâo anŏ kơtưn, tơlơi kiăng khăp pơđĭ kyar Dak Nông kơ mơnuih ƀon sang thâo wơ̆t hăng abih bang anom bruă čar. Ƀing ta kiăng khŏm ngă rơđah amăng bruă prăp rơmet, pơsit tuh pơ plai, tơlơi djru hiư̆m pă khŏm lăi rơđah...khŏm ngă kiăng anom bơwih ƀong hăng mơnuih ƀon sang đăo gơnang. Biă ñu lĕ hăng mơnuih ƀon sang lĕ khŏm pơƀuh brơi kơčăo bruă anun pơđĭ kyar klă brơi mơnuih ƀon sang, anun lĕ hơdră ngă bruă kiăng hơmâo abih bang mơnuih gum ngă, biă ñu lĕ ngă bruă bơwih brơi tuai hyu ngui”.

Nai prin tha Trần Du Lịch: hăng lu tơlơi gêh gal, Dak Nông dưi hrưn đĭ kơtang hloh.

Mông jơnum hmư̆ tơlơi pơgôp hiăp mơng ƀing rơgơi kơhnâo hloh ƀơi dêh čar kơ bruă bơwih ƀong, pơtô hrăm, boh thâo kĭ thuâ̆t brơi ƀuh tơlơi gir mơng Ping gah, gong gai tơring čar Dak Nông amăng bruă ĕp jơlan ba tơring čar pơplih tui, hrưn đĭ dưi ngă tơlơi mơ̆ Tơlơi pơtrun jơnum ping gah tơring čar Dak Nông tal 12, rơwang thun 2020-2025 ba tơbiă, anun lĕ gir jing tơring čar bơwih đĭ kyar ƀrô hăng pơdrong amăng thun 2025 laih anun tơring čar pơđĭ kyar pơdrong amăng thun 2030 mơng kual Dap Kơdư.

Minh Huệ: Čih - Siu H’Mai: Pơblang