Ngă tui hơdră djru prăk kơ mơnuih pơgang klin tui Tơlơi pơtrun mrô 16 thun 2021 mơng Kơnuk kơna, tơdơi kơ lu wơ̆t tla prăk, truh mông anai tơring čar Dak Nông ăt dŏ dong hnưh mơn kơ ƀing ơi ia jrao, hăng mrô prăk rơbêh 32 klai. Lăi pơthâo kơ tơlơi anai, ơi Huỳnh Thanh Huynh, Kơ-iăng khua gơnong bruă ia jrao Dak Nông brơi thâo:

“Anom bruă ia jrao hơmâo ngă hrŏm hăng anom bruă prăk lăi pơthâo kơ Jơnum min mơnuih ƀon sang tơring čar kiăng pơsir brơi, ră anai hơmâo Jơnum min mơnuih ƀon sang tơring čar pơhrua nao yơh mrô prăk kiă yua amăng thun 2023, amăng anun pơhrua tui prăk tla kơ adơi ayong gum pơgang klin thun 2020, 2021 hăng 2022 jing rơbêh 32 klai prăk”.

Ƀơi mông jơnum hăng ƀing mă tơlơi pơhing phrâo anai, yă Tôn Thị Ngọc Hạnh, Kơ-iăng khua Jơnum min mơnuih ƀon sang tơring čar Dak Nông, lăi pơhmư̆, hơmâo lu tơlơi ngă kơ tơring čar kaih brơi prăk apah ƀing ơi ia jrao gum pơgang klin Covid-19. Ha bơnah lĕ tơring čar dŏ tơnap tap, tơnap pơpha prăk, ha bơnah dong lĕ yua ngă kiăo djơ̆ tơlơi phiăn. Ră anai hơdôm tơlơi ngă tơnap anai hơmâo pơsir laih:

“Ƀing gơmơi amăng hơdôm hrơi rơgao gir git gai khut khăt hăng Gơnong bruă ia jrao, gơnong bruă Prăk či pơsir bruă brơi prăk kơ anom bruă ia jrao, samơ̆ khŏm pơhlôm djơ̆ akŏ tlôn, djơ̆ tơlơi phiăn, ƀu dưi pioh hơmâo soh glăi ôh, yua hnun jing kaih hĭ. Ră anai prăp lui či tla laih, tom brơi tom adih anai gơmơi hơmâo ĕp ƀuh laih anih mă prăk, khŏm tơguan prăk thun 2022 rơbêh či pơpha hyu, giong anun khŏm pơdơi bruă pơkŏn či pơƀut brơi prăk kơ anom bruă ia jrao. Tơring čar hơmâi lăng ba biă mă yơh, samơ̆ yua ƀu thâo anŏ ngă yua dah tơring čar rin, prăk ƀu hơmâo ôh, anun jing tơnap biă”.

Rơwang hrơi tơjuh rơgao (lơ 30/6), Jơnum lok 20 mơng Anom bruă dêh čar pơgang, pơgăn klin Covid-19 jơnum mơng ataih lăng amăng tivi hăng hơdôm boh tơring čar ƀon prong. Mông jơnum anai hơmâo bơkơtuai, pơtŏng glăi hăng lăi pơthâo abih laih klin Covid-19 ƀơi Việt Nam. Phrâo anai, Khua dêh čar ơi Phạm Minh Chính git gai Ding jum ia jrao prăp lui hră pơ-ar pơsit Covid-19 jing tơlơi ruă ƀă hyu mơng djuai A  jing B (anai lĕ djuai hŭi rơhyưt kơtang biă mă amuñ ƀă hyu lu anih, hơmâo mơnuih djai lu jing tơlơi duam ruă hŭi rơhyưt amuñ lar hyu, amuñ djai mơn) laih anun anăp nao lăi pơthâo abih klin ƀơi Việt Nam.     

Hrŏm hăng lăi pơthâo abih klin Covid-19, gah rơngiao Jơnum lok 5, Khua pơ ala mơnuih ƀon sang dêh čar tal 15, ƀing khua ăt kiăng ngă rơđah bruă brơi prăk, pơsit glăi hăng gơnam măi mok, gơnam yua gah ia jrao hơmâo arăng djru, ƀu dưi pioh lui đôč amăng anih pioh gơnam, hŭi prai khưi khai gơnam yôm hơmâo mơng bruă ƀing ta iâu pơthưr gum pơgôp. Ơi Trần Văn Lâm, grup khua mơng Bắc Giang, Ding kơna Jơnum min Prăk kăk mơng ƀirô khua pơ ala mơnuih ƀon sang dêh čar lăi, hơmâo arăng lăi yua dram gơnam aka ƀu hơmâo djŏp hră pơ-ar či wai lăng, mă yua tui hăng gơnam kơnuk kơna:

“Hrơi blan hơmâo klin arăng djru ba rai măi mok tui anun đôč yơh, hlơi mơng pơmin pơplih gơnam anai jing gơnam kơnuk kơna hiư̆m pă? Khŏm hơmâo hră pơ-ar, nua pơkă, hơnong pơkă kĭ thuâ̆t hiư̆m pă. Tơlơi anai amăng tơlơi phiăn prăk kăk ăt brơi laih, tŭ kơ čih hăng ba mă yua, bơ gơnam anun nua ñu hơdôm pă lĕ ƀu kiăng čih ôh, truh hrơi gơnam anai ba sĭ glăi kah mơng kiăng čih nua. Lơ̆m glăk tơguan lĕ čih ană gơnam gah rơngiao, tơdơi kơ anun mă yua hiư̆m kiăng klă đôč”.

Ƀing khua pơ ala mơnuih ƀon sang ăt lăi mơn kiăng Việt Nam pơplih klin Covid-19 mơng tơlơi ruă ƀă hyu djuai A jing djuai B. Anun lĕ tơlơi duam ruă hŭi rơhyưt kơtang jing tơlơi ruă hŭi rơhyưt laih anun lăng anai jing tơlơi ruă pơjrao phara pơkŏn, bruă pơsir hăng tla prăk ăt kiăng kiăo tui kah hăng tơlơi ruă gah anih pơjrao pơkŏn. Lăng abih bang, ơi Tạ Văn Hạ, grup khua mơng Quảng Nam lăi ăt khŏm kiăng pơtă hlâo hăng kơđiăng djuai kman pơplih phrâo:

“Kơ boh thâo ia rơgơi anom bruă ia jrao rŏng lŏn tơnah hơmâo lăi pơthâo laih. dua dong kiăo tui tơlơi hơmâo sit ƀơi Việt Nam amăng bruă bơwih ƀong hơdip mơda ră anai hơđong glăi laih. Tơlơi hŭi klin ngă tơdu ƀiă mơn, tañ suaih mơn. Kiăo tui tơlơi anun kiăng ta thâo pơsit abih klin, samơ̆ ăt kiăng pơtă pơtăn pơgang mơn lơ̆m hơmâo djuai kman phrâo”.

Amăng 3 thun pơgang klin brơi ƀuh tơlơi gir run mơng abih bang mơnuih, gum hrŏm pơgang klin samơ̆ ăt hơmâo mơn lu tơlơi truh ƀing ta ƀu kiăng. Anai jing tơlơi kơđiăng kiăng ječ ameč prăp rơmet wơ̆t anih anom gơnam tam, hră pơ-ar tơlơi phiăn, hơdră pơtô ba kiăng pơgang klă hloh klin kheng pơkŏn dong tơdah hơđuh đĭ.