Lơ 7/8, Grup hyu mă bruă mơ̆ng Khul git gai gưl dêh čar kơ bruă pơhlôm, pơgang tơlơi truh lŏn adai ngă, Kơ-iăng Khua ding jum Bruă hmua hăng pơđĭ kyar plơi pla ơi Nguyễn Hoàng Hiệp, Kơ-iang khua Khul ba jơlan hlâo, nao ĕp lăng tơlơi pơhing hơjan ia ling dăo, lŏn tơhlŏm ƀơi tơring čar Dak Nông. Grup rơkâo tơring čar Dak Nông khom tañ pôr pơthâo tơlơi pơhing ječ ameč lŏn adai ngă kiăng hơmâo hơdră pơsir tui hăng hơdôm tơlơi glăm ba bruă mă ječ ameč. Hơjan hlim amăng hơdôm hrơi laih rơgao ƀơi Dak Nông ngă kơ 2 čô mơnuih djai, giăm 200 boh sang hăng rơbêh 650 ha hmua đang ia dong mlĕp, lu ring bruă, jơlan glông tơdrông tua, bơnư̆ pơkong ia răm kơtang, pơkă lăng anŏ răm ƀăm rơbêh 250 klai prăk.

Laih nao sem lăng tơlơi pơhing sit nik, ăt kah hăng nao ĕp lăng hơdôm anih lŏn tơhlŏm hăng ring bruă bơnư̆ pơkong ia hlăk răm pơčah lŏn tơhroh, dlưh prong ƀơi Dak Nông, grup hyu mă bruă lăi pơtong, tơlơi truh lŏn adai ngă ƀơi Dak Nông hlăk răm rai kơtang biă mă. Tơring čar khom hơmâo hơdră pôr tơlơi ječ ameč truh hŭi rơhyưt yua lŏn adai ngă laih anun ĕp hơdră pơsir tañ hơdôm ring bruă răm kơtang kah hăng bơnư̆ pơkong ia, jơlan glông nao rai. Khom jŭ yap glăi tañ bruă pơhlôm, pơgang hŭi pơčah bơnư̆ pơkong ia kiăng hmao kru pơsir djơ̆ lăp.