VOV4.Jarai - Ƀơi anăp kơ tơlơi tơnap tap mơng klin Covid-19 ƀơi tơring čar Dak Nông, Khua Jơnum min mơnuih ƀon sang tơring čar ơi Hồ Văn Mười git gai djop gơnong bruă, djop ƀon lan pơphun bruă khut khăt , ngă tui tơlơi gơgrong mơng mơnuih apăn akŏ amăng bruă pơgang klin laih dong ngă tui hơdôm bruă jao amăng pơđĭ kyar bơwih ƀong huă-mơnuih mơnam. Yap truh mơguah lơ 23/2, đơ đam tơring čar Dak Nông hơmâo 13.169 čô mơnuih ƀă klin Covid-19. Amăng anun lu mơnuih pơjrao suaih hăng dưi glăi pơ sang.

Khăm, pơjrao brơi mơnuih ƀă klin Covid-19 ƀơi sang ia jrao Čư̆ Jut, Dak Nông

Amăng 2 wŏt hrơi tơjuh giăm anai, klin Covid-19 ƀơi Dak Nông glăk tơnap tap, mrô mơnuih phrâo ƀă klin đĭ tui kơtang. Amăng mông jơnum lăng nao rai mơng ataih hăng hơdôm tơring glông, plơi prong kơ bruă pơgang klin, ơi Hồ Văn Mười, Khua Jơnum min mơnuih ƀon sang tơring čar  Dak Nông lăi pơtong, hơdră yôm phun lĕ tlâ̆o vaccine hăng ngă tui 5K. Khua Jơnum min mơnuih ƀon sang tơring čar Dak Nông rơkâo, hrŏm hăng bruă pơgang klin Covid-19, khua mua djop gơnong bruă, anom bruă, gong gai ƀon lan kiăng khut khăt ngă tui hơdôm bruă jao amăng pơđĭ kyar bơwih ƀong huă mơnuih mơnam mơng anai pơ anăp.

Siu Đoan: Pơblang