VOV4.Jarai - Dong mơng tơdơi kơ hrơi Tê̆t thun anai, ƀơi Dak Nông hơmâo ƀuh giăm 1000 čô nai pơtô hăng čơđai sang hră ƀă klin Covid-19. Samơ̆ ră anai anom bruă pơtô hrăm tơring čar ăt pơhlôm brơi kiăng čơđai sang hră gưl 2, gưl 3 nao hrăm pơ sang hră mơn. tui hăng mrô jŭ yap mơng Gơnong bruă pơtô hăng pơjuăt Dak Nông, mơng hrơi čơđai nao hrăm glăi tơdơi kơ hrơi Tê̆t truh ră anai, tar ƀar tơring čar hơmâo ƀuh 132 čô nai pơtô hăng rơbêh 800 čô čơđai ƀă klin Covid-19. Yua mrô mơnuih ƀă klin lu hloh ƀơi čơđai hrăm gưl sa hăng anih mầm non anun jing Dak Nông brơi čơđai mầm non hăng gưl sa amăng tơring čar pơdơi nao hrăm pơ sang hră truh kơ hrơi hơmâo tơlơi pơtrun phrâo dong; hơdai hrăm online dong, hrăm amăng tivi laih anun hơmâo nai pơtô brơi hră kiăng pơkra ƀai.

Čơđai mơng anih 6 truh anih prong ƀơi Dak Nông nao hrăm pơ sang hră

Ƀing čơđai sang hră gưl 2, 3 ăt hrăm pơ sang hră mơn, bơ ƀing sang hră amuñ ƀă klin kah mơng brơi hrăm mơng ataih. Ơi Nguyễn Văn Toàn, Khua gơnong bruă pơtô hăng pơjuăt Dak Nông brơi thâo, Gơnong bruă git gai hơdôm boh sang hră ngă tui klă tơlơi pơtrun pơgang klin, ƀu dưi pơ-ai ôh, samơ̆ ăt ƀu dưi bral lơi. Ră anai tơring čar ăt pơhlôm brơi čơđai sang hră mơng anih 6 truh anih prong hloh nao hrăm pơ sang hră mơn.

Siu H’Mai: Pơblang