Amai Lê Thị Phương Thu, dŏ ƀơi plơi Đức Hòa, jing mơnuih ngă bruă ƀơi Jơnum min mơnuih ƀôn sang să Đức Mạnh, tơring glông Dak Mil, tơring čar Dak Nông. Amai Thu lăi, sang anŏ ñu hơmâo dua čô ană anet, pô prong hrăm anih 6, pô anet hrăm anih 1. Rơkơi ñu ngă tơhan, ƀu hơmâo dŏ pơ sang đơi ôh, sa čô ñu đôč rông ană, anun jing rim truh bơyan pơdơi prong, ñu bơngơ̆t biă mă kơ ană ñu lơ̆m nao ngui tom ƀing gơyut. Amăng anun, tơlơi bơngơ̆t kơtang hloh mơ̆ng ñu lĕ hŭi nao mơnơi pơ ia dơnao:“Wai lăng ƀing ană amăng bơyan pơdơi prong hăng rơkơi bơnai gơmơi tơnap biă mă, yua dah tơdah brơi gơñu dŏ pơ sang ngui mă gơñu đôč lĕ ƀu hơđong ôh. Anun jing gơmơi ba nao pơ ơi yă dua bơnah lăng ba. Bơ brơi gơñu ngui mă hơjăn, kâo pơtă pơtăn anăm nao ngui pơ anih hơmâo dơnao, ia krông, hŭi biă mă amăng bơyan pơdơi sang hră”.

Dak Nông hơmâo đơ đam lŏn prong rơbêh 6.500km2, hơmâo dơnao, ia krông lu biă mă, amuñ hơmâo tơlơi truh ƀlung ia. ayong Điểu Lê Nam Nam, Khua wai lăng hlăi ai čơđai anet amăng sang hră Khul hlăk ai tơring čar Dak Nông brơi thâo kiăng plai ƀiă hơmâo tơlơi truh, hrơi blan rơgao, djŏp anom bruă hơmâo man pơkra 20 boh dơnao luai ia ƀơi 7 boh tơring glông, plơi prong hăng pơphun hơdôm rơtuh wơ̆t pơtô brơi čơđai hrăm luai. Laih dong, ngă hrŏm hăng hơdôm gơnong bruă, anom bruă, plơi pla pơphun ngă lu hơdră djru čơđai pơhlôm pơgang tơlơi truh rơbuh rơbeč, rơka rơkač, biă ñu lĕ ƀlung ia:“Hlăk ai tơring čar hơmâo git gai laih hơdôm grup hlăk ai sang hră, plơi pla, mă aloa hyu pôr pơthâo kơ mơnuih ƀôn sang pơ hơdôm boh plơi pla, hơdôm anih juăt hơmâo tơlơi truh djai ƀlung ia. Rơngiao kơ anun, hyu hlă gong pơhŭi hlâo, ƀơk phao (kơsu đung amăng ia) pơkra mă brơi kơ hơdôm boh sang anŏ dŏ jê̆ dơnao, hơmâo dơnao ia či pơgang tơlơi truh ƀlung ia. Ngă hrŏm hăng kông an, gong gai să nao pơ rim boh sang anŏ hơmâo dơnao klơi mă kĭ hră ƀuăn hơmâo hơdră pơhlôm pơgang tơlơi truh ƀlung ia”.    

Jŭ yap mơ̆ng Gơnong  bruă ia jrao tơring čar Dak Nông brơi thâo, mơ̆ng akŏ thun truh kơ ră anai ƀơi tơring čar hơmâo 14 wơ̆t tơlơi truh rơka rơkač, ngă 20 čô mơnuih djai. Amăng anun 12 wơ̆t tơlơi truh ƀlung ia ngă kơ 18 čô čơđai djai, jing lu biă mă pơhmu hăng thun 2024. Hơdôm tơlơi truh ƀlung ia juăt hơmâo ƀơi hơdôm boh tơring glông Dak Mil, Dak R’lấp, Tuy Đức, Dak Glong hăng plơi prong Gia Nghĩa. Ơi Hoàng Viết Nam, Kơ-iăng khua gơnong bruă ia jrao Dak Nông lăi pơthâo: “Tơlơi truh ƀlung ia ƀơi tơring čar Dak Nông hrơi blan rơgao lêng kơ hơmâo ƀơi hơdôm boh dơnao klơi mă mơ̆ng sang anŏ yơh phun. Yua hnun hăng Anom bruă ia jrao, gơmơi jak iâu hơdôm boh sang anŏ lăng ană bă klă hloh, ngă hiư̆m pă kiăng hơmâo anih ngui rơnuk rơnua hloh kơ ƀing čơđai amăng bơyan pơdơi prong 2025 anai”.

Ơi Trần Sĩ Thành, Kơ-iăng khua gơnong bruă pơtô hăng pơjuăt tơring čar Dak Nông brơi thâo, truh bơyan pơdơi prong rim thun, Gơnong bruă ngă hrŏm hăng Kông an tơring čar, Gơnong bruă ia jrao hăng amĭ ama ƀing čơđai pơphun ngă lu hơdră pơhlôm pơgang hlâo tơlơi truh rơka rơkač, amăng anun hơmâo tơlơi truh ƀlung ia kơ ƀing čơđai. Gơnong bruă ăt git gai hơdôm boh sang hră pok anih hrăm gah rơngiao mông hrăm phun kơ tơlơi thâo thăi pơhlôm pơgang tơlơi truh kah hăng apui lơtrik kĕ, đuh pơtuh apui ƀong, tơlơi truh pơjrŏm pơtlă ƀơi jơlan, biă ñu lĕ ƀlung ia:“Gơnong bruă ngă hrŏm hăng Hlăk ai tơring čar, hơdôm anom bruă lơ̆m jao glăi čơđai sang hră kơ amĭ ama wai lăng lĕ khŏm pơtô lăi, pơtô brơi ƀing čơđai thâo pơgang tơlơi truh amăng bơyan pơdơi sang hră. Laih dong, git gai hơdôm boh sang hră ngă hrŏm hăng amĭ ama, sang anŏ ƀing čơđai wai lăng ană bă klă ƀiă, brơi čơđai nao hrăm bruă pơgang tơlơi truh rơka rơkač, rơbuh rơbeč, biă ñu lĕ brơi čơđai hrăm luai”.

Pơhlôm pơgang tơlơi truh ƀlung ia ƀơi ƀing čơđai ƀu kơnong jing tơlơi gơgrong bruă mơ̆ng rim boh sang anŏ đôč ôh mơ̆ ăt jing bruă kiăng ječ mơ̆ng djŏp gưl, anom bruă, gong gai hăng abih bang mơnuih tơpuôl. Hơdôm mrô jŭ yap kơ mơnuih djai ƀlung ia ƀơi Dak Nông ngă rơngôt kơtang biă mă, jing jua teng kiăng abih bang răng kơđiăng, khŏm kiăng hơmâo tơlơi gum ngă mơ̆ng abih bang, ngă khut khăt hloh. Hơdôm anom apăn bruă anai kiăng pơtrut pran jua gơgrong bruă, pơtrut tui bruă pôr pơhing, pơtô kiăng thâo pơgang lơ̆m bưp tơlơi truh, pok anih hrăm luai, hyu krăo lăng hơdôm anih juăt hŭi rơhyưt...kiăng hơmâo tơlơi hơdip rơnuk rơnua kơ ƀing čơđai, biă ñu lĕ amăng bơyan pơdơi prong./.