VOV4.Jarai-Mơ̆ng thun 2006-2021, Dak Nông lĕ tơring čar ngă tui hơdră pơhrŏ mrô sang anŏ ƀun rin hmar hloh amăng kual Dap Kơdư. Tơring čar anai ăt pơdah thâo lu hơdră ngă tui kiăng tañ hrŏ ƀun rin hơđong. Tui hăng mrô jŭ yap mơ̆ng Anom bruă jŭ yap dêh čar, mơ̆ng thun 2006-2021 Dak Nông lĕ tơring čar dong tal sa amăng kual Dap Kơdư hăng sa amăng 10 tơring čar mrô sang anŏ ƀun rin hrŏ hmar hloh amăng dêh čar, truh rơbêh 18% mrô sang anŏ ƀun rin. Ngă tui Hră pơtrun mrô 7/2021 pơkă djơ̆ hnong yap ƀun rin mơ̆ng thun 2021-2025 jing hnong pơkă ƀun rin phrâo, tơring čar Dak Nông ră anai dŏ 18.200 boh sang anŏ ƀun rin, dưm dưm hăng 11% mrô sang anŏ amăng tơring čar.

Pơblih pơjeh phun pla hlô mơnong rông djru lu sang anŏ ƀơi Dak Nông pơklaih ƀun rin

Amăng anun, hơmâo 2/3 mrô sang anŏ ƀun rin jing mơnuih djuai ƀiă. Ping gah tơring čar Dak Nông hơmâo ngă hră pơtrun, Jơnum min mơnuih ƀôn sang tơring čar ngă tui akŏ bruă pơkă tơhnal pơhrŏ ƀun rin boh ƀiă ñu 3% mrô sang anŏ rin sa thun, lu hloh dua wơ̆t tui hơdră mơ̆ng dêh čar. Tơhnal pơkă mơ̆ng tơring čar Dak Nông dŏ lu hloh lĕ amăng kual mơnuih djuai ƀiă, lơ̆m ngă tui anŏ pơkă lĕ khom pơhrŏ 5% pơngŏ. Tơring čar gir run truh thun 2025 amra ƀu hơmâo sang anŏ ƀun dơ̆ng tah tui hnong pơkă phrâo.

Nay Jek: Pơblang