Tui hăng tơlơi pơsit mơ̆ng Gơnong bruă hmua hăng pơđĭ kyar ƀôn lan tơring čar Dak Nông kơ bruă dưm dăp glăi mơnuih wai lăng glai rưng gah Anom bruă phun wai lăng glai tơring čar, Anom bruă wai lăng glai tơring glông Dak Glong hăng Anom bruă wai lăng glai plơi prong Gia Nghĩa hơmâo pơmut glăi jing Anom bruă wai lăng glai pơlir hơbit tơring glông Dak Glong - Gia Nghĩa. Anom bruă wai lăng glai tơring glông Tuy Đức hăng tơring glông Dak R’lấp hơmâo pơmut jing Anom bruă wai lăng glai Tuy Đức - Dak R’lấp. Anom bruă wai lăng glai tơring glông Dak Song hăng Dak Mil pơmut jing Anom bruă wai lăng glai Dak Song - Dak Mil. Anom bruă wai lăng glai tơring glông Krông Nô hăng Čư̆ Jut hơmâo pơmut jing Anom bruă wai lăng glai Krông Nô - Čư̆ Jut.

Tui hăng tơlơi lăi pơthâo mơ̆ng anom bruă wai lăng glai tơring čar Dak Nông, 8 anih wai lăng glai mơ̆ng 8 boh tơring glông, plơi prong hlâo adih hơmâo 23 čô khua. Tơdơi kơ dăp glăi, amra pơhrŏ trun 4 čô khua, 18 čô mơnuih mă bruă hơmâo dưm dăp glăi, 1 čô khua pơdơi lơtret tañ tui hăng tơlơi pơkă.