VOV4.Jarai - Yua hơget amăng 3 thun hăng anai, Dak Nông lêng dong gah rơnuč mrô puang pơplông abih anih 12. Anai jing bruă hơmâo lăi nao prong biă ƀơi mông Jơnum lok 4, Jơnum min pơ ala mơnuih ƀon sang tơring čar Dak Nông tal 4, pơphun amăng 2 hrơi rơgao. Pơplông abih anih 12 thun 2022, Dak Nông hơmâo mrô mơnuih đĭ anih 96,7%; mrô puang yap tong krah rim tơlơi hrăm hơmâo 5,9 puang, dong mrô 61/63 boh tơring čar, ƀon prong. Anai jing thun tal 3 Dak Nông dong gah rơnuč mrô puang pơplông abih anih 12.

Jơnum min pơ ala mơnuih ƀon sang tơring čar Dak Nông tơña kơ bruă pơtô hrăm

Lăi glăi hăng Khua mua pơ ala mơnuih ƀon sang tơring čar Dak Nông, ơi Nguyễn Văn Toàn, Khua gơnong bruă pơtô hăng pơjuăt tơring Dak Nông lăi, yua dah mrô čơđai sang hră hrăm thâo ƀơi tơring čar aset biă, anun jing mrô puang aset mơn. Anai dong, hơmâo lu čơđai mă yua hră học bạ pioh ruah hrăm gưl prong, bruă pơplông kiăng mă puang đĭ anih 12 đôč. Hăng tơring čar dŏ tơnap tap kar hăng Dak Nông, ơi Nguyễn Văn Toàn lăi tơnap biă mơng dưi pơplih mrô dăp bruă pơplông abih anih 12 mơng tơring čar.

Siu H’Mai: Pơblang