Ơi Đoàn Minh Thuận, Kơ-iăng Khua Jơnum min mơnuih ƀôn sang să Quảng Trực, tơring glông Tuy Đức, tơring čar Dak Nông brơi thâo, lơm năng ai ñu krah mlăm lơ 31/7, ƀơi ƀon Bu Krắc, să Quảng Trực, hmâo sa dua jua pơtuh prong. Truh mơguah lơ 1/8, mơnuih ƀôn sang ƀuh lu anih lŏn čơđang.

Tơdơi kơ hmư̆ hing, gong gai să Quảng Trực hăng khul gơgrong bruă anai mơ̆ng tơring glông Tuy Đức hmâo nao laih pơ̆ anih anom pel ĕp. Ƀơi anai ƀuh hmâo lu anih lŏn čơđang ataih 200m, prong mơ̆ng 10-15cm amăng kual mơnuih ƀôn sang dô̆. Tơdơi kơ anun mơtăm, gong gai hăng khul gơgrong bruă anai hmâo pơsur, rit đuăi mơnuih ƀôn sang hrŏm hăng kông ngăn tơbiă mơng kual lŏn čơđang nao pơ̆ anih pơhlôm klă. Ră anai Gong gai să Quảng Trực hăng tơring glông Tuy Đức glăk pok pơhai khul mơnuih hăng hơdôm jơlan gah pioh pơgang hlôm hlâo huĭ hmâo tơlơi truh./.