Dŏ tong krah đang boh kruăi mih, boh kuit mơtah mơda hiam biă mă gah tơkai čư̆ apui kơdir Nâm Kar, amai Nguyễn Thị Mai, Khua anom ngă ƀong hrom ngă hmua pla kyâo boh čroh hơdjă rơgoh Quảng Phú, să Quảng Phú, tơring glông Krông Knô ƀu wor rơbit ôh hơdôm hrơi ñu wưh pơtâo, dăp pơƀut, ĕp lŏn ngă hmua pla kyâo boh čroh (boh troh). Pô hmua brơi thâo, kiăng dưi pla phun boh kruăi, boh kuit hơdjă rơgoh kual lŏn pơtâo jĕ kual čư̆ apui kơdir đưm đă adih anai, hơdră gir run biă mă, pơjing rai lŏn mơnai, hơmâo rơ̆k lu mơta, kiăng pơđam lui rơ̆k brŭ rĭm thun pơđĭ tui brơi kơpal. Yua khin hơtai, ngă tui hơdră phara biă mă, tơdơi kơ 5 thun, sang anŏ gơñu pĕ hơmâo yơh boh ƀong mơmih ƀơi kual lŏn pơtâo pơrơkă pơrơkưng, khil khul bă hră tơl sir lŏn.

Rơbêh 4 ha lŏn đang pla boh kruăi, boh kuit ñu pĕ pơhrui giăm 100 tơn rĭm thun, hơmâo lu bơnah sĭ mơdrô kĭ hră blơi tơl hmua hăng rơnoh sa kg 35 rơbâo prăk. Boh čroh ñu sĭ mơdrô hơđong, arăng ba nao pơ hơdôm Siêu thị pơprong ƀơi ƀôn prong Hồ Chí Minh, Bình Dương, Hà Nội hăng hơdôm tơring čar ieo gah. Mơ̆ng boh tơhnal tŭ yua anai, amai Mai ngă hrom hăng lu sang anŏ mơnuih ƀôn sang amăng kual, akŏ pơjing sang bruă ngă ƀong hrom ngă hmua pla phun boh čroh hơdjă rơgoh pơsir bruă mă kơ rơbêh 50 čô mơnuih mă bruă hơđong hăng rơnoh pơhrui glăi pơkă dưm dưm sa čô sa blan 10 klăk prăk.

“Rơgao 20 thun sĭ mơdrô boh čỏh hơbơi pơtơi gơmơi hơmâo mơnuih blơi lĕ mơ̆ng dêh čar Japan adih, ăt djru pơtô brơi tơlơi thâo thăi găn rơgao. Laih anun ĕp amăng hơdrôm hră pơtô brơi, kơsem min tong ten mơ̆ng anun ta khin pla hăng tuh pơ alin. Sang bruă ngă ƀong hrom glăk pok prong đơ đam pla laih anun djru sang bruă prong hloh, djop pô ngă hrom hlăk pla tui hơdră ngă rơgoh ayuh hyiăng soh. Laih anun, kiăng pok prong tui amra pơđĭ kyar jing kual pla boh kruăi phara hơjăn mơ̆ng anih lŏn hơbâo tơpur čư̆ apui kơdir đưm đă rŏng lŏn tơnah”.

Ăt đĭ tui mơ̆ng bruă mă sĭ mơdrô ia kơphê arăng mơñum, ngă kơphê hơdjă rơgoh, amai Đâụ Thị Nguyệt, dŏ pơ ploiw ƀut mrô 4, tơring kual Dak Mâm, tơring glông Krông Knô, hơmâo pơđĭ kyar jing anom ngă ƀong hrom Tín True coffe. Ră anai, anom ngă ƀong hrom gơñu hơmâo 7 ding kơna ngă hrom hăng 20 boh sang anŏ mơnuih pla kơphê hơdjă rơgoh, pơjing rai gơnam sĭ mơdrô 8 mơta kơphê tơpung kơ-uă giong, hăng hlăk kơsem min pơkra rai mơ̆ng bơnga hăng kơđoh kơphê jing gơnam sĭ mơdrô mơ̆n. Amai Đậu Thị Nguyệt brơi thâo:

“Ƀrư̆ ƀrư̆ ngă rah, hrăm rah laih anun akŏ pơjing sang bruă ngă ƀong hrom ba gơnam sĭ mơdrô rơgoh hơdjă kơ djop mơnuih mơñum huăi ngă sat kơ suaih pral lĕ ta mơak yơh, yua huăi hyu blơi gơnam mơ̆ng rơngiao, djop mơta hơmâo pơkra ming mă ta pô hơđong pran jua yơh. Kâo čang rơmang ană plơi pla ngă hrom amăng anom bruă gơmơi, hrom hơbit kơtưn gir mơ̆ng anet đĭ nao prong, ăt khom gir run biă mă yơh, ngă hiư̆m pă dưi pơsir brơi bruă mă kơ kơ mơnuih ngă ding kơna hơmâo prăk pơhrui glăi lu hloh, hơđong”.

Tui hăng amai Nguyễn Thị Mai, Khua Khul đah kơmơi mut phung tơring kual Dak Mâm, tơring glông Krông Knô, hơdôm hơbô̆ bruă yua đah kơmơi ngă pô hơmâo găn rơgao lu tơlơi tơnap tap, hrưn đĭ ngă bruă ba glăi boh tŭ yua lu, hiam klă, djru ƀing adơi amai hơđong pran jua mă bruă, huăi anit glăi drơi pô ôh, sit mut hrom mơnuih tơpuôl hăng mơnuih mơnam plơi pla:

“Ƀuh rơđah mơ̆n boh tơhnal pơhrui glăi bơwih ƀong huă hơmâo lu lĕ, tơlơi gơgrong ba, kơnuih ƀing adơi amai đah kơmơi mut phung dưi pơđĭ tui. Mơ̆ng anun yơh, hơbô̆ bruă blung a anai djop gưl đah kơmơi mut phung amra tŭ mă tơlơi hrăm pioh ĕp hơdră pơsir klă hloh pioh kơ ta pok pơhai lu hơbô̆ ngă bruă tơdơi anai dơ̆ng, čang rơmang ƀing adơi amai hơmâo tơlơi pơmin phrâo, hor kơ bruă amra djru ba abih pran jua ta ƀing adơi amai anun kiăng tŭ yua amăng tơhnal pơtrun ƀing gơñu ruah mă”.

Yă H’Vi Êban, Khua khul đah kơmơi mut phung tơring čar Dak Nông brơi thâo, kiăng pơtrut tơlơi đăo kơnang, ngă pô kơ ƀing adơi amai đah kơmơi, thun blan rơgao, djop gưl anom bruă mut phung amăng tơring čar pơphun lu bruă mă tŭ yua biă, thâo pơčeh phrâo, djơ̆ găl hăng anŏ hơmâo sit nik. Lu hơbô̆ bruă pơphun bruă mă, djru ba, pơtrut bruă mă kơ ƀing adơi amai đah kơmơi tơdu brơi gơñu hrưn đĭ ngă bruă tŭ yua hloh, Djru kiăng hơmâo anŏ gêh găl, kơnang kơ bruă gơgrong anăn čan prăk sang bruă prăk djru mơnuih mơnam hăng rơnoh prăk djru pơsir bruă mă mơ̆ng khul đah kơmơi djop gưlm hơmâo brơi truh 1000 klai păk kơ 23 rơbâo čô ding kơna adơi amai đah kơmơi mut phung čan bơwih ƀong huă:

“Amăng thun blan pơ anăp, Khul đah kơmơi mut phung tơring čar ăt amra pơtrut pok pơhai hơdră đah kơmơi hrưn đĭ pơklaih mơ̆ng ƀun rin, ngă khua pô amăng tơlơi hơdip mơda. Rơđah biă mă ñu, ƀing gơmơi ngă tui klă Kơčăo bruă đah kơmơi pơphun bruă mă thun 2017-2025. Hrom hăng anun, gơmơi amra ngă hrom hăng lu anom bruă pơtô hrăm pơsir bruă mă, lăi pơthâo ĕp bruă mă pơ anih kiăng mơnuih, pơčrâo bruă kơ mơnuih kiăng ĕp, dưi ngă hră pơar čan prăk pioh lui rơmŏn kŏn rin hăng pơđĭ kyar bơwih ƀong huă”.

Hăng tơlơi beč bal, thâo pơčeh phrâo, h’ĭn pran jua mă bruă, đah kơmơi ƀơi Dak Nông hlăk pơsit tong ten tơlơi gơgrong ba mơ̆ng gơñu lơ̆m ngă tui lu hơbô̆ bruă pơđĭ kyar bơwih ƀong huă, pơđĭ tui rơnoh prăk pơhrui glăi hăng pơjing rai pran kơtang amăng mơnuih mơnam.