VOV4.Jarai - Khua Anom wai lăng anih anom sĭ mơdrô tơring čar Daklak brơi thâo, ƀơi anăp tơlơi lu anih anom sĭ ia xăng ia jâu amăng đơ đam dêh čar ta krư̆ bah amăng, pơdơi sĭ mơdrô, Khul wai lăng anih anom sĭ mơdrô tơring čar Daklak hmâo kơtưn wai lăng anih anom, pel ĕp tơlơi sĭ mơdrô ia xăng ia jâu amăng tơring čar hăng thâo lu anih anom sĭ ia xăng ia jâu krư̆ bah amăng. Rơđah biă ñu, khul wai lăng anih anom sĭ mơdrô hmâo thâo 19 bôh anom sĭ mơdrô ia xăng ia jâu glăk pơdơi jăng jai, pơdơi sĭ mơdrô.

Amăng anun, 16 bôh anih anom abih ia xăng ia jâu, 3 bôh anom pơdơi sĭ yua mơnuih mă bruă hmâo tơlơi duam ruă, pô anom sĭ mơdrô lĕ F1 hăng răm đing ƀô̆p. Hơdôm anih anom pơdơi sĭ mơdrô pơ̆ lu anih anom kah hăng tơring glông Čư̆ Mgar, Krông Năng, Ƀôn Đôn, plơi prong Buôn Ma Thuột. Pơ̆ anăp anai, Anom wai lăng anih anom sĭ mơdrô tơring čar Daklak amra kơtưn pel ĕp bruă sĭ ia xăng ia jâu kiăng hmao hmâo hơdôm tơlơi rơkâo đĭ, ba tơbiă kiăng pơtlaih tơlơi tơnap kơ hơdôm bôh anom bơwih ƀong, hrom hăng anun tañ thâo hăng pơsir tơpă hơdôm mơnuih hưp ƀong, djă kŏng gơnam tơdah hmâo./.

Siu H’ Prăk: Pơblang