VOV4.Jarai - Mrô mơnuih ƀă Sars-CoV-2 đĭ lu na nao amăng hơdôm hrơi rơgao ngă mơnuih ƀôn sang ƀơi tơring čar Daklak luh nao blơi kit pơčrang lăng tañ. Yua kơ mrô mơnuih rơkâo blơi lu, ƀơi anih sĭ mơdrô kơƀah hĭ kit pioh sĭ. Amai Nguyễn Thị Thanh Tâm, pô anih sĭ gơnam mă yua gah ia jrao An Tâm ƀơi jơlan Y Jut, plơi prong Buôn Ma Thuột brơi thâo, 3 hrơi jê̆ hăng anai, tuai tơña blơi kit pơčrang lăng lu, lu hloh kơ 3 wot bơhmu hăng hlâo adih. Lom anun, mrô kit test blơi lĕ hmâo rơnoh pơkă anun ƀu djop pioh sĭ. Ƀu djơ̆ kơnong kơ blơi kit glăi pơčrang mă pô đôč ôh, mrô mơnuih ƀôn sang hyu ĕp hơdôm anih anom pel ĕp pơjrao gah anom ia jrao mơnuih ƀôn sang, Sang ia jrao să, phường, Sang ia jrao prong pioh test tañ, test PCR ăt đĭ lu mơn bơhmu hăng hlâo kơ Tết. Ră anai, sa per kit pơčrang lăng tañ hăng ia adung blơi mơng Prăng, Đức hmâo nua mơng 70.000 -80.000 prăk./.

Siu H’ Prăk: Pơblang