VOV4.Jarai - Lom lơ 14/2, hơdôm bôh sang hră wai lăng čơđai anet, gưl sa ƀơi tơring čar Daklak sit nik čơkă čơđai sang hră nao sang hră tơdơi rơbêh kơ 8 blan hrăm lăng nao rai mơng ataih. Khă hmâo tơlơi prăp lui hlâo lom brơi ană pơwot glăi sang hră samơ̆ amĭ ama čơđai bơngot mơn yua kơ čơđai anet, gưl sa akă dưi tlâ̆o vaccine, akă thâo rơnak drơi jăn anun tơnap biă kiăng ƀing čơđai ngă tui klă tơlơi pơkă pơgang hlôm hlâo klin kheng.

Kiăng pơphun pơtô pơhrăm ƀơi sang hră pơhlôm hăng ba glăi bôh tơhnal, hlâo kơ anun Gơnong bruă pơtô pơhrăm tơring čar Daklak hmâo pơphun hơdôm grup hyu pel ĕp bôh nik hơdôm bôh sang hră, rơkâo pơhlôm hơdôm tơlơi pơkă, jơlan gah klă hloh amăng pơgang, pơgăn klin. Thun hrăm 2021-2022, tơring čar Daklak hmâo rơbêh kơ 1.000 bôh sang hră hăng rơbêh kơ 450.000 čô čơđai ƀơi hơdôm gưl hrăm. Hơdôm hrơi anai abih bang mơnuih apăn bruă, nai pơtô čơđai, mơnuih mă bruă amăng sang hră Daklak hmâo tlâ̆o pơgang ƀiă biă mă ñu 2 ară vaccine pơgang Covid-19 hăng rơbêh kơ 20% dưi tlâ̆o ară tal 3./.

Siu H’ Prăk: Pơblang