VOV4.Jarai - Mơguah lơ 5/6, ơi Mai Văn Thắng – Khua Jơnum min mơnuih ƀôn sang să Ea Hleo, tơring glông Ea Hleo (Daklak) pơsit, ƀơi să phrâo hmâo tơlơi ia ƀlung ngă 3 čô čơđai sang hră gưl 2 Chu Văn An, să Ea Hleo djai. Hơdôm mơnuih djai anun dưi pơsit lĕ mô̆ Trần Thị Kim Anh; Nguyễn Thị Hoài Bảo hăng Mã Cẩm Tú, wot 3 gơñu tơkeng thun 2010, dô̆ hrom ƀơi să Ea Hleo, tơring glông Ea Hleo hăng gơñu lĕ čơđai sang hră anih 6 mơng Sang hră gưl 2 Chu Văn An.

Tơlơi ia ƀlung truh amăng čơtlăm tom dih (4/6), lom 3 čô čơđai Anh, Bảo hăng Tú nao pơhmư̆ mông Klah čun thun hrăm ƀơi Sang hră gưl 2 Chu Văn An giong, laih anun bơjak nao rai nao pơ̆ kual čroh ia Óc gah thôn 5, să Ea Hleo, tơring glông Ea Hleo kiăng ngui. Tơdơi kơ hmâo tơlơi ia ƀlung mơtăm, mơnuih pơ ala kơ gong gai plơi pla hmâo nao tơña, pơsur pran jua, rơngôt hrom hăng brơi ƀơ ƀiă prăk kơ mơnuih mơng sang anô̆ pô djai kiăng bơwih kơ bruă jôk atâo./.         

Siu H’ Prăk: Pơblang