VOV4.Jarai - Lơ 17/5, Grŭp khua pơ ala mơnuih ƀôn sang tơring čar Daklak hmâo laih mông mă bruă hăng Jơnum min mơnuih ƀôn sang tơring čar hăng hơdôm gơnong bruă, jơnum min, kiăng prăp lui hơdôm bôh yôm kơ tal jơnum lok 3, Khua pơ ala mơnuih ƀôn sang tal 15. Lu tơlơi gum pơhiăp bơdjơ̆ nao hơdră bruă amăng pơđĭ kyar bơwih ƀong mơnuih mơnam mơng tơring čar hmâo pơhrua nao amăng hră lăi pơthâo glăi kơ Khua pơ ala mơnuih ƀôn sang dêh čar.

Ƀing khua pơ ala gum pơhiăp rơkâo đĭ truh grŭp khua pơ ala mơnuih ƀôn sang dêh čar

Amăng mông mă bruă, Khua pơ ala kơ hơdôm gơnong bruă, jơnum min tơring čar Daklak hmâo lăi laih lu tơlơi tơnap hăng rơkâo kơnuk kơna pel ĕp, pơtlaih brơi kơ bruă pơđĭ kyar bơwih ƀong mơnuih mơnam ƀơi tơring čar pơ̆ anăp anai, kah hăng pơđĭ kyar apui yua pơkra glăi pơsit jơlan gah pơđĭ kyar truh thun 2045, Kơnuk kơna, Ding jum sĭ mơdrô khom pel ĕp pơplih pơkra rơnoh pơkĕ apui kiăng pơđĭ kyar apui yua pơkra glăi ƀơi Daklak. Ƀing khua pơ ala ăt rơkâo mơn lu bôh yôm bơdjơ̆ nao bruă lŏn čuah, pel ĕp hơdră pơkă pha ra kơ plơi prong Buôn Ma Thuột, bruă pơkă kual, mă yua lŏn; bruă sa dua črăn jơlan dêh čar glăk răm tui samơ̆ akă hmâo prăk pơkra glăi. Grŭp Khua pơ ala mơnuih ƀôn sang tơring čar Daklak hmâo tŭ mă tơlơi gum pơhiăp, rơkâo đĭ mơng ƀing khua pơ ala, ruah mă, kah pơpha kiăng lăi pơthâo kơ Khua pơ ala mơnuih ƀôn sang dêh čar hăng hơdôm Ding jum gơnong bruă pel ĕp./.

Siu H’ Prăk: Pơblang