Pơsit kơ bruă mă thun 2022, ƀing khua pơ ala lăi lĕ, bruă bơwih ƀong – mơnuih mơnam đơ đam tơring čar Daklak thun anai hmâo lu gru rơđah. Khă hnun hai, pơsir prăk mă yua kơ bruă hrom ƀu lu ôh (kơnong kơ hmâo 29,5%), nao hrom anun lĕ bruă pơplih pơkra pơhrua nao rơwang bruă lu wot, anô̆ klă hơdôm ring bruă akă pơhlôm hmâo bơbeč truh tơlơi đăo gơnang mơng mơnuih ƀôn sang ăt kah hăng bruă hơkrŭ glăi bơwih ƀong tơdơi kơ klin Covid-19.

Hăng bruă đang hmua, ƀing khua pơ ala Khul pơ ala mơnuih ƀôn sang tơring čar Daklak rơkâo ba tơbiă lu hơdră, hơdră bruă rơđah kiăng djru mơnuih ngă đang hmua pơđĭ kyar tui hơdră phrâo, pơjing jơlan pơlir hơbit kơplah wah anom bơwih ƀong hăng mơnuih ngă đang hmua. Hrom hăng anun, kiăng pơkă rơđah, pơdŏng mrô kual pla kơ hơdôm djuai phun bôh troh, kiăng bĕ pơlar hyu ča, mrô gơnam lu hloh kơ mrô kiăng. Hrom hăng anun, ƀing khua pơ ala ăt lăi mơn hơdôm tơlơi hang tơngia mơng tơring car Daklak, kah hăng pơsir bruă mă kơ mơnuih mă bruă; pơdong hơdră bruă, hơdră djru kơ mơnuih apăn bruă gah plơi pla, pơđĭ tui prăk pơhrui glăi, tơlơi hơdip mơda kiăng nai pơtô hơđong pran jua mă bruă./.