VOV4.Jarai - Ƀơi Sang hră đại học Tây Nguyên (plơi prong Buôn Ma Thuột, tơring čar Daklak) hmâo pơphun jơlan hơdră brơi drah gum djru Hrơi tơjuh mriah tal 14 thun 2022. Khă glăk amăng tơlơi klin ngă tơnap tap, hơdôm rơtuh čô čơđai gưl dlông mơng sang hră ƀu dô̆ djưng djư kơ bruă brơi drah. Hăng tơlơi pơtă “Brơi drah djru mơnuih – Tơlơi hơdip gơyut hăng kâo”, jơlan hơdră brơi drah gum djru Hrơi tơjuh mriah tal 14 thun anai ƀơi Sang hră đại học Tây Nguyên ngă pơhư̆č lu čơđai gưl dlông gum hrom.

 Amăng jơlan hơdră anai, grŭp pơphun bruă brơi drah hmâo tŭ mă laih 606 anung drah. Sang hră đại học Tây Nguyên ăt jing anih tuč rơnuč, jưh glăi Jơlan hơdră Hrơi tơjuh mriah ƀơi Daklak thun anai. Amăng giăm truh 1 ha mơkrah blan rơgao, jơlan hơdră Hrơi tơjuh mriah ƀơi Daklak hmâo tŭ mă giăm truh 3.500 anung drah, ba nao pơ̆ hơdôm bôh sang ia jrao hăng anom ia jrao amăng tơring čar kiăng djop drah brơi kơ bruă pơjrao ječ hăng pơjrao kơ mơnuih ruă./.

Siu H’ Prăk: Pơblang