VOV4.Jarai - Daklak khom khut khăt hloh dong amăng bruă pơgang ia ƀlung kơ čơđai” anai lĕ tơlơi rơkâo mơng Grŭp hyu mă bruă mơng Jơnum min bôh thâo – Pơtô pơhrăm Khua pơ ala mơnuih ƀôn sang dêh čar tal 15 lơm mă bruă hăng Jơnum min mơnuih ƀôn sang tơring čar Daklak kơ bruă ngă tui hơdră bruă, tơlơi phiăn pơgang pơgăn ia ƀlung kơ čơđai ƀơi tơring čar amăng čơtlăm lơ 11/8.

Ơi Tạ Văn Hạ, Kơ-iăng Khua Jơnum min bôh thâo – mơnuih mơnam mơng Khua pơ ala mơnuih ƀôn sang dêh čar pơhiăp amăng mông mă bruă

Tui tơlơi lăi pơthâo glăi mơng Jơnum min mơnuih ƀôn sang tơring čar Daklak, tơlơi ia ƀlung gah čơđai ƀơi tơring čar ăt dô̆ hmâo na nao mơn, mrô čơđai djai thun dơi lu hloh thun hlâo. Dong mơng thun 2016 truh ră anai hmâo rơbêh kơ 420 čô čơđai djai yua kơ ia ƀlung, kơnong kơ 6 blan akô̆ thun 2022, hmâo laih 55 čô mơnuih djai, lu biă ñu ƀơi ƀing čơđai hnưr mơng 6-13 thun. Pơhiăp amăng mông mă bruă, ơi Tạ Văn Hạ, Kơ-iăng Khua Jơnum min bôh thâo – mơnuih mơnam mơng Khua pơ ala mơnuih ƀôn sang dêh čar hmâo lăi pơthâo kơ tơlơi tơnap hăng akă dưi ngă mơ̆ tơring čar Daklak glăk bưp. Hrom hăng anun rơkâo hơdôm gưl, hơdôm gơnong bruă amăng tơring čar khom pơđĭ hloh dong bruă gơgrong amăng bruă lăi pơhing, pơtô juăt pơđĭ tui tơlơi pơmin kơ abih bang mơnuih ƀôn sang pơgang bĕ ia ƀlung kơ čơđai./.

Siu H’ Prăk: Pơblang