VOV4.Jarai - Ƀrô djơ̆ hrơi hơdor glăi 67 thun Hrơi pioh kơ ơi ia jrao dêh čar Việt Nam (27/2), lơ 25/2, Grŭp hyu mă bruă mơng Ping gah tơring čar, Jơnum min mơnuih ƀôn sang tơring čar Daklak hmâo nao čuă, hơ-ư̆č hmưi khua nua, grŭp mơnuih mă bruă ia jrao mơng Gơnong bruă ia jrao, Anom ia jrao wai lăng tơlơi duăm ruă tơring čar hăng Sang ia jrao prong kual Dăp Kơdư.

Ƀơi Gơnong bruă ia jrao, ơi Nguyễn Đình Trung, Khua gum bruă ping gah dêh čar, Khua git gai Ping gah tơring čar hmâo hmư̆ khua mua Gơnong bruă ia jrao lăi pơthâo glăi sa dua bruă mă mơng gơnong bruă amăng hơdôm hrơi rơgao. Ƀơi anăp tơlơi klin Covid-19 ngă tơnap hăng sui hrơi, Gơnong bruă ia jrao hmâo hăng glăk hmâo iâu pơhrui khul mơnuih kiăng pơhlôm brơi bruă pơgang, pơgăn klin, wai lăng klin Covid-19. Ră anai, abih bang hơdôm bôh Sang ia jrao, Anom ia jrao tơring glông leng kơ pơdŏng Kual pơjrao mơnuih djơ̆ Covid-19 kiăng tŭ mă pơjrao mơnuih ƀă Covid-19 tui hơdră anom ia jrao “pơjrao rah kơ mơnuih pơkon, pơjrao rah kơ mơnuih ƀă Covid-19”. Pơhiăp amăng mông mă bruă Khua git gai Ping gah tơring čar ơi Nguyễn Đình Trung mơ-ĭt tơlơi hơ-ư̆č hmưi truh abih bang mơnuih apăn bruă, mơnuih mă bruă čar hăng mơnuih mă bruă gah ia jrao; čih pioh hơdôm bôh tơhnal gơnong bruă dưi ngă amăng hơdôm thun phrâo rơgao hmâo djru yôm phăn kiăng tơring čar ngă giong hơdôm tơhnal pơkă pơđĭ kyar bơwih ƀong – mơnuih mơnam, biă ñu wai lăng klin ruă Covid-19 ƀơi tơring čar./.

Siu H’ Prăk: Pơblang