Dong mơng krah blan 11 thun anai, Grŭp črâo ba kơ hyu hơduah ĕp tơlang tơleng, tum pơƀut hăng pơsit anăn păn tơlang tơleh tơhan pơsăn drơi (iâu klah čun lĕ Grŭp črâo ba 515) tơring čar Daklak hmâo ngă lơphet pơphun bruă kơ grŭp K51 nao pơ̆ tơring čar Mondulkiri, dêh čar Kur hyu hơduah ĕp, tum pơƀut tơlang tơleh, ba glăi tơlang tơleh tơhan pơsăn drơi Khul ling tơhan nao gum hrom hăng mơnuih juăt bruă Việt Nam pơsăn drơi amăng hơdôm rơnuk blah ngă ƀơi dêh čar Kur amăng bơyan phang 2022-2023.

Ƀơi dêh čar Kur, Grŭp črâo ba 515 tơring čar Daklak hmâo pok pơhai hơdôm bruă mă pơbưp, lăi pơhing, pơsur gong gai hăng mơnuih ƀôn sang dêh čar Kur đing nao, ngă gal brơi kơ mơnuih mă bruă Grŭp K51 lom ngă tui bruă jao.

Hrom hăng anun, hmâo bruă djru ba mơnuih ƀôn sang; lăi pơhing tum djop hơdôm hơdră gum djru tui hơdră bruă mơng dêh čar Việt Nam pioh kơ hơdôm mơnuih lăi pơhing djơ̆ pơsat ling tơhan Việt Nam pơsăn drơi. Lom mă bruă, ƀing mă bruă gah Grŭp K51 ăt ngă tui mơn hăng ngă tui tơpă tơlơi phiăn Kơnuk kơna Kur, pơpŭ gru hiam bôh thâo, phiăn juăt mơng plơi pla./.