VOV4.Jarai - Amăng bruă pơgang pơgăn klin Covid-19 ƀơi Daklak, gum hrom hăng tơlơi gum djru mơng khul ơi ia jrao dô̆ hmâo tơlơi gum hrom ƀu anet mơng mơnuih amăng khul đăo dong. Amăng 4 blan rơgao, gơñu ƀuh ƀô̆ ƀơi Sang ia jrao pơjrao mơnuih djơ̆ klin hăng kual pơjrao mơnuih ruă klin Covid-19 kraih ƀơi Sang ia jrao prong kual Dăp Kơdư kiăng djru ƀing ơi nai ia jrao pơsur pran jua, bơwih brơi kơ F0 yak rơgao tơlơi klin ruă ngă.

Agaih rơnăk drơi jăn kơ mơnuih ruă Covid-19 ƀơi kual pơjrao mơnuih ruă kraih ƀơi Sang ia jrao prong kual Dăp Kơdư lĕ bruă mă rim hrơi mơng grŭp mơnuih hyu djru rai mơng ƀing Sơr Nữ Vương Hoà Bình, plơi prong Buôn Ma Thuột, tơring čar Daklak amăng 4 blan rơgao. Sơr Nguyễn Thị Thanh Huyền brơi thâo, hrom hăng bơwih brơi tơlơi ƀong huă, pơhrua nao gơnam ƀong huă, djru mơnuih ruă agaih rơnăk drơi jăn..., hơdôm mơnuih hyu gum djru ăt na nao mơn juh alum, pơsur, pơtrut pran jua, djru ƀing ruă plai ƀiă tơlơi pơmin ƀu klă:

“Ƀuh bruă anai tŭ yua, ƀuh mơ-ak dong, khă sum ao pơgang drơi anai bơngot bơngañ hai, samơ̆ kâo ƀuh dưi ngă bruă hơget kơ mơnuih ruă lĕ kâo ngă, kâo juh alum pran jua gơñu. Gơñu rai pơ̆ anai gơñu ƀuh hel hol ha jăn, gơñu amra djai ha jăn pơmin tui anun, samơ̆ hmâo ta dô̆ giăm, ta juh alum, gum djru, bơwih brơi gơñu gơñu hmâo tơlơi mơ-ak yua kơ ăt dô̆ hmâo mơn mơnuih lăng ba pô. Ƀing sơr mă bruă mưn ƀuh kah hăng mơnuih amăng sang anô̆ hnun, mă bruă ƀu kiăng pơđar lăi hơget ôh laih anun mơ-ak amăng pran jua dong.”

Ƀing sơr Nữ Vương Hoà Bình gum djru mơnuih ruă Covid-19

Bơ̆ hăng sơr Lê Thị Thịnh, hơdôm hrơi mă bruă ƀơi anih anom pơjrao mơnuih ruă Covid-19 hmâo djru laih ƀing hyu gum djru mưn ƀuh tơlơi ruă nuă, tơlơi ƀu hơđong amăng pran jua mơng mơnuih ruă tơpă sit hloh. Bruă ba glăi tơlơi mơ-ak, tơlơi hơđong kơ mơnuih glăk rim hrơi blư̆ kup blư̆ đang hăng tơlơi ruă sit nik hmâo bôh tŭ yua biă hăng ƀing mơnuih rŏng hyu gum djru mă pô.

“Hmâo bôh tŭ yua biă, yua kơ pô mưn ƀuh pô dưi gum djru lu mơnuih ruă nuă hăng gơñu kiăng kơ pô biă. Ƀuh anai lĕ hơdôm mơnuih adơi ayong pô mơ̆ gơñu bưp tơlơi tơnap hloh kơ pô lĕ hmâo tơlơi suaih pral pô amra tuh rơyuh pran jua kơ gơñu abih bang hơdôm tơlơi hơget mơ̆ pô dưi ngă.”

Pơsur mơnuih ruă hơđong pran jua

Hrom hăng hơdôm bruă pơjrao klă mơng khul ơi nai ia jrao, tơlơi gum djru abih pran jua mơng mơnuih hyu gum djru hmâo djru laih mơnuih ruă Covid-19 hăng mơnuih pô sang mơnuih ruă pơđao pran jua dong. Ơi Nguyễn Xuân Tưởng, ƀơi să Ea Nam, tơring glông Ea Hleo brơi thâo, 10 hrơi dô̆ gak ƀơi sưng đih ama ñu ruă, lăng ƀuh hơdôm bruă mă yôm phăn mơng ƀing sơr ñu ƀuh ol kơdol pran jua biă. Ƀing sơr pơ ala kơ pô sang mơnuih ruă, abih pran jua bơwih brơi, pơsur pran jua brơi gơñu:

“Ƀơi anai hmâo sơr nao agaih rơnăk laih anun pleh sum ao brơi djop mơta, lăi hrom lĕ agaih rơnăk brơi kơ mơnuih ruă hơpă leng kơ tui anun soh.”

Tui hăng ơi ia jrao Nguyễn Văn Tính, mă gah anom hơkrŭ glăi drơi jăn tơdơi pơjrao ruă kraih, tơlơi gum djru mơng ƀing mơnuih gum djru jing kiăng biă, djru sang ia jrao plai ƀiă kơ mơnuih mă bruă. Ƀing mơnuih gum djru hmâo hăng glăk hmâo bruă gơgrong amăng bruă wai lăng agaih rơnăk drơi jăn kơ mơnuih ruă ƀơi anih pơgang, pơgăn klin Covid-19, djru gơnong bruă ia jrao ngă klă hloh dong bruă pơjrao. Ơi ia jrao Nguyễn Văn Tính lăi lĕ, rơngiao kơ bruă pơjrao hăng ia jrao lĕ, bruă pơjrao hăng tơlơi khăp păp, hăng pran jua lĕ yôm phăn biă hăng mơnuih ruă Covid-19.

“Plai ƀiă lu biă. Sa lĕ ƀing sơr bơwih brơi mơnuih ruă mơng bruă ƀong huă truh bruă agaih rơnăk drơi jăn, laih anun pơsur pran jua mơnuih ruă. Bruă pran jua mơnuih ruă yôm phăn biă arăng lăng rŭp arăng ƀuh lu mơnuih djai laih, arăng ăt ƀu thâo mơn hơbin truh kơ pô anun gơñu huĭ biă, hmâo ƀing sơr pơsur pran jua gơñu.”

Amăng bruă yak rơgao tơlơi ruă huĭ rơhyư̆t mơng mơnuih ruă Covid-19 ƀơi Sang ia jrao prong kual Dăp Kơdư, hrom hăng hơdôm bruă mă mơng ơi nai ia jrao, dô̆ hmâo tơlơi gum djru, khăp păp mơng ƀing gom drơi kơ yang. Tơlơi kiăng khăp anun hmâo pơplih laih jing tơlơi klă hiam hăng lu mơnuih ruă Covid-19.

Hlâo kơ anun, lom tơlơi klin ruă Covid-19 dô̆ ngă glêh tơnap hăng huĭ rơhyưt, mơnuih đăo khôp ƀơi Daklak ăt hmâo mơn lu bruă mă gum djru, djru hơdôm bôh sang anô̆ mơnuih ruă. Mục sư Lemous Philemol, Khua Grŭp pơ ala kơ Khul đăo phrâo hiam tơring čar Daklak brơi thâo: rơngiao hơdôm gơnam brơi kơ abih bang mơnuih ƀôn sang kual klin ngă, Grŭp pơ ala kơ Khul đăo phrâo hiam tơring čar Daklak ăt jao mơn gơnam brơi mơng Jơnum min ia jrao mơnuih mơnam Khul đăo phrâo hiam Việt Nam kual Dơnung dêh čar kơ hơdôm bôh sang anô̆ tui đăo lĕ F0, F1 ƀơi Daklak lĕ hơdôm anung braih hmâo nua 300 klăk prăk hăng djru hơdôm F0, F1 giăm truh 400 klăk prăk. Grŭp pơ ala pơtă pơtăn na nao hơdôm Grŭp, Khul đăo phrâo hiam đơ đam tơring čar ngă tui tơpă tơlơi pơtă 5 mơta bruă pơgang klin mơng Ding jum ia jrao hăng hơdôm bruă pơgang pơgăn klin. Hrom hăng anun pơdŏng grŭp “Ơi ia jrao Luca” lăi pơthâo tơlơi suaih pral online kơ mơnuih ƀu bưng hmâo tơlơi ruă Covid-19./.

VOV Tây Nguyên: Čih – Siu H’ Prăk: Pơblang