VOV4.Jarai - Hơdôm hrơi anai, plơi bơnga Xóm Đảo ƀơi tơring kual Buôn Trấp, tơring glông Krông Ana, tơring čar Daklak jing ik ăk hloh. Tui ƀing pô đang bơnga, thun anai lu sang hmâo pơhư prong lŏn pla bơnga tết bơhmu hăng djop thun. Ayuh hyiăng gêh gal, nua sĭ hơđong hăng đĭ ƀơbiă anun mơnuih pla bơnga mơ-ak biă.

Ba tuai nao čuă lăng đang bơnga sĭ kơ hrơi tết, ơi Hoàng Yên, ƀơi ƀut mrô 7, tơring kual Buôn Trấp, tơring glông Krông Ana, tơring čar Daklak brơi thâo, abih bang hơdôm bôk bơnga leng kơ hmâo mơnuih rơkâo blơi hlâo, hơdôm hrơi dong amra jao. Bơyan bơnga tết thun anai, ơi Yên pla 3 ar bơnga cúc hăng lay ơn djop mơta, đĭ ha mơkrah bơhmu hăng djop thun hlâo adih. Amăng tơlơi klin Covid-19 ngă tơnap, samơ̆ hăng mrô arăng blơi ră anai, ơi Yên ăt mơ-ak mơn kơ bruă sĭ bơnga amăng tal tết tui phiăn juăt thun anai.

“Lăi hrom thun anai ayuh hyiăng klă hloh hơdôm thun hlâo adih anun thun anai ƀing gơmơi pla lu hloh kơ hơdôm thun hlâo adih. Yak blung a mơng krah blan 10 hăng krăh blan 11 blan di nua bơnga sĭ hmâo nua lu ƀing gơmơi ăt mơ-ak mơn tui hăng kâo pơkă lăng hlâo tết anai nua bơnga ăt đĭ mơn”.

Mơnuih blơi bơnga nao tơl đang kiăng rơkâo blơi lui hlâo bơnga Tết

Ăt pơhư prong mơn lŏn pla bơnga tết bơhmu hăng hơdôm thun hlâo adih, ơi Trần Đình Sang, Khua Grŭp mă bruă hrom pla bơnga tơring kual Buôn Trấp brơi thâo, mơng 1 blan hlâo, lu mơnuih hyu blơi bơnga hmâo nao rơkâo blơi hlâo tơl ƀơi đang, nua ñu đĭ ƀiă mơn bơhmu hăng hlâo. Ƀu kơnong kơ sang anô̆ ñu đôč ôh, lu mơnuih amăng grŭp ăt pơhư prong lŏn pla bơnga tết sôh kiăng djơ̆ hăng tơlơi kiăng sĭ blơi yua. Ră anai, plơi bơnga Xóm Đảo, ƀơi grŭp mrô 7, tơring kual Buôn Trấp dưi lăng lĕ “đang bơnga” prong hloh tơring glông Krông Ana. Hrom hăng pơđĭ kyar bruă pla bơnga, hơdôm blah đang dô̆ pơlir hơbit ngă hơdră “Plơi bơnga hơdjă” pioh kơ mơnuih ƀôn sang, tuai hyu čuă ngui nao čuă lăng bơnga hăng cơphin rŭp, jing anih tuai čuă ngui, djru neh wa đĭ tui dong prăk pơhrui glăi amăng tal tết. Ơi Trần Đình Sang lăi:

“Ră anai sang kâo pla 4 ar, biă ñu lĕ bơnga cúc djop mơta hăng bơnga lay ơn djop ia mơtah mriah, djop djuai dong. Ră anai tết gum mă bruă hrom ƀing gơmơi hmâo rơkâo blơi hlâo amăng tal tết lu biă anun amra ñu amăng tết pơ̆ anăp ƀu hmâo bơnga sĭ yua kơ tal hlâo klin ngă lu anun neh wa ƀơi hơdôm kual pơpkon hơdư̆ pla bơnga samơ̆ grŭp mă bruă hrom ƀu djưng djư ôh pơhư dong lŏn pla hăng ră anai sang hơpă leng kơ pơhư lŏn pla sôh”.

Buč pơhrui bơnga jao kơ pô sĭ bơnga

Pơdŏng mơng rơnuč thun 2018, Grŭp mă bruă hrom pla bơnga tơring kual Buôn Trấp ră anai hmâo 14 čô mơnuih, abih bang pla hmâo giăm truh 3 ektar. Ƀu kơnong kơ pla bơnga sĭ kơ hrơi tết ôh, hơdôm mơnuih amăng grŭp dô̆ juăt sĭ amăng hơdôm hrơi krah blan yap tui blan di, hrơi pơdơi lơphet dong, hăng lu djuai bơnga kah hăng bơnga cẩm chướng, cúc, lay ơn, đồng tiền. Tui hăng ơi Nguyễn Xuân Hậu, Khua Khul mơnuih ngă đang hmua tơring kual Buôn Trấp, bruă pla bơnga djru laih lu sang anô̆ hơđong prăk pơhrui glăi, ngă tui pran kơtang mơng plơi pla amăng pơđĭ kyar bơwih ƀong huă, sĭ mơdrô. Bruă pơphun hmâo mơng grŭp mă bruă hrom pla bơnga ăt jing gêh gal hloh mơn kơ mơnuih ƀôn sang amăng bruă čan prăk, gum hrom hơdôm anih pơhrăm bôh thâo, mơng anun mă yua bôh thâo phrâo hơdră phrâo amăng bruă bơwih ƀong huă, sĭ mơdrô.

“Ƀing gơmơi ăt đing nao pơdŏng mơn grŭp mă bruă hrom, hrom hăng anun yua prăk kơ bruă pơjing bruă mă kơ neh wa ƀơi anai hăng gơnang kơ anun Khul mơnuih ngă đang hmua hơdôm gưl ngă gal brơi rim bơyan bơnga truh ƀing gơmơi pơtrut kơtang bruă lăi pơhư̆č hơdôm gơnam amăng plăng facebook ăt kah hăng amăng hơdôm măi mok por pơhing kiăng ngă hiưm hơpă djru neh wa dưi sĭ gơnam pô ngă rai”.

Tơdơi hơdôm hrơi krĕt kruai yua bơbeč mơng klin ruă, hơdôm gru nam klă mơng anih anom sĭ bơnga tết hmâo djru laih mơnuih pla bơnga ƀơi tơring kual Buôn Trấp, tơring glông Krông Ana, tơring čar Daklak hmâo tơlơi mơ-ak dong. Ayuh hyiăng gêh gal, nua sĭ hơđong ba glăi neh wa čang rơmang kơ bơyan bơnga tết djơ̆ bơyan, hmâo nua./.

            H’Xíu: Čih – Siu H’ Prăk: Pơblang